ብቻውን እናምልክ

በጸናች ክንዱ
በተዘረጋች እጁ
በድንቅ እየሠራ
ምሪት እየመራ
ያዳናቸውን ቃል የዕሪታቸውን መልስ
ኪዳኑን ሲረሱ ልባቸውም ሲረክስ
የአርባ ቀን ቆይታ ትዕግስት ነስቷቸው
ያወጣን ያዳነን ሙሴ ቀረ ብለው




የሚታዩ አማልክት ሊሰሩ መከሩ
በአመጻ ሰልጥነው ፍጹም ደነቆሩ፡፡
                 ቁልቁል ተንደርዳሪ የለውም መቆሚያ
                 ሙሴንም ጣሉና ሰገዱ ለጥጃ
                 ከግብጽ ባርነት ከሞት ቤት ያወጡን
                 እንዲያ በታ'ምራት ለማዕረግ ያበቁን
                 እኒህ ናቸው አማልክቱ
                 ስለደስታው ብሉ ጠጡ …
               ቀኑ ዛሬ ‹‹የእግዜር›› በዓል ሆኗል
               ደስታ ተድላው ተትረፍርፏል
               ብለው ገና ሳይጨርሱ
               መጣ የአምላክ ጽኑ ፍርዱ፡፡
ከሰገነት መውረድ መቅኖ የለሽ ጉዞ
ደንቁሮ ታውሮ ተዋርዶ ደንዝዞ
ጥቂት በመታገስ ጸንተው ስላልቆሙ
ትልቁን ፈጣሪ በክፉ አማልክት ዝሙት ስላስቀኑ
ከህይወት መጽሐፍ ተደምስሰው ጠፉ፡፡
በሚከፋ ስህተት እኛም እንዳንያዝ
ሰብሮ በሚያቆስለው በሰንበሌጥ ምርኩዝ እንዳንመረኮዝ
አይናችንን ከእርሱ ከትልቁ ጌታ
ነቅለን ወደፍጡር አና'ርግ ለአፍታ እንኳ
አሊያ እንደ እስራኤል ነውና መዋረድ
እርሱን አንዱን ጌታ ብቻውን እናምልክ፡፡