ቀን ሳለ ተመለስ

መቅረዝ ዕድሜህ ፈክቶ
እንደበር ተከፍቶ
ህመምህ ርቆ
መቆምህም ፀድቆ
ዳፍንት ሳይመጣ
ቀኑ ሳይሆን ማታ፤




ድንገት ሳይጨላልም
ኑሮህ ሳይገደም
ብርሃንህ ሳይያዝ
ጉልበት ሳይደነዝዝ
ቀን ሳለ ተመለስ
ተንደህ ሳትፈርስ፡፡

ታግለህ በምትጥለው
ሮጠህ በምትቀድመው
በጉብዝና ወራት
በዘር መዝሪያህ ሰዓት
በደመ ክርስቶስ
የታነጽኽው መቅደስ
ቀን ሳለህ የመዳን
ይኽው በእውነት አሁን
ዛሬ ይሁን ልደትህ
ከፈጠረህ ጌታ መታረቂያ ቀንህ፤

የዛገው ቀለበት ያደፉት ልብሶችህ
የራስህ ባርኔጣ መጫሚያ የእግሮችህ
የተሰባበረው መመርኮዣ ዘንጉ
ይለወጡ ዛሬ ፍፁም ይታደሱ
የጠፋው ይህ ልጄ ተገኘልኝ ዛሬ
ሙቱ ህያው ሆነ የሚለው ዝማሬ
ይሰማ ስላ'ንተ በብርሐን ቀኑ
ቀን ሳለ ተመለስ ከዛሬም አሁኑ፡፡