ይህስ ከመናፍቅነት ያንሳልን?

Please read in PDF

 በአጭር ቃል በእኛ መካከል ዝሙት እንዳለ ይታወቃል፡፡ኃጢአት ከእግዚአብሔር መንግስት እንደሚያወጣ ለድርድር በማይቀርብበት በሐዲሱ ኪዳን ዘመን እንደነውር እንኳ ሳይቆጠር ዝሙት በመካከላችን አብቦ ፈክቷል፡፤መናፍቅነትን ሊያወግዝ ደቦ የሚጠራ ህብረታችን ዝሙትን ለማውገዝና እንደመናፍቅነት ያለ ኃጢአት ነው ለማለት ድፍረቱ የተሰለበብን ይመስላል፡፡
    ቤተ ክርስቲያንን በጥፋታቸውና በአሰቃቂነታቸው ወደር ያልተገኘላቸው አላውያን ነገስታት ፈጽሞ ከክርስቶስ ሊለይዋት አልቻሉም፤ነገር ግን የገዛ ኃጢአቷ ፈጽሞ ከጌታዋና ከሙሽራዋ ኢየሱስ ይለያታል፡፡ የቆሮንቶስ ቤተ ክርስቲያን በከባድ ተግሳጽ ከተወቀሰችበት ኃጢአት አንዱና ትልቁ ባላመኑ አህዛብ ዘንድ እንኳ ያልተሰማ አዲስ ነውር በክርስቶስ ቤተ ክርስቲያን ውስጥ መሰማቱና መታየቱ ነው፡፡ፍጥረታዊውና እንሰሳዊ ማንነታችን ውስጣችንን ሲገዛ በአደባባይ ለመፈጸም ከማናፍርባቸው ኃጢአቶች አንዱ ዝሙት ነው፡፡
       ፍጥረታዊ ሰው ለነውሩ ዳርና ድንበር የለውም፡፡በእግዚአብሔር አደባባይ ከመናገር እስከማድረግ እንኳ ፊቱን አይመልስም፡፡የተገለጠ ኃጢአቱን ሲናገረው እንደጀብዱነትና ዕውቀትም ያወራዋል፡፡ዝሙቱ በግልጥ ታውቆ በቤተ ክርስቲያን መካከል ይመላለስ ለነበረው ቆሮንቶሳዊ ታላቁ ልከኛ ሐዋርያ ፦ ከቅድስቲቱ ህብረትና ከመንፈስ ቅዱስ ጋር ያስተላለፈው ውሳኔ የዛሬዎቹን አብያተ ክርስቲያናት በግልጥ የሚዘልፍ ነው፡፡በማናኛውም ሰው ላይ አብያተ ክርስቲያናት የሚያስተላልፉት የውግዘት (ከማህበረ ምዕመናን መለየት)ውሳኔ እንደቅዱስ ጳውሎስ ካልሆነ ውግዘታቸው ከቡድንና ከግለሰብ ሐሳብ የመነጨ ጥላቻ እንጂ የመንፈስ ቅዱስ ሐሳብ አይሆንም፡፡እንኳን በበደለ በአንድ ምዕመን በአገልጋዮች ላይ እየተወሰደ ያለው የዛሬው “ውግዘት” ግን እጅጉን የሚያሳዝን ነው፡፡
       ወደቀደመ ነገር ስንመለስ በሐገራችን በደቡብ ባለ አንድ “ታላቅ” ገዳም ውስጥ በኮሚቴነት  በሚያገለግል አንድ ሰው “ሆቴል” ቤት ውስጥ ዕድሜያቸው አስራ ስምንት አመት የማይመሉ እህቶች ለዝሙት ከመማገዳቸው ባለፈ እርቃን ጭፈራና የህብረት ዝሙት እንደሚፈጸም ጠራራ ፀሐይ ያስተዋለው እውነት ነው፡፡ግና ዛሬም ይኸው ሰው ለቤተ ክርስቲያን “ቆሜያለው” ከሚል ማህበር ጋር “በቤተ ክርስቲያን ቤተ ክርስቲያንን እየመሩ” አሉ፡፡
      ሌላ የነውር ምሳሌ፦በምስራቅ ሐገራችን “በታወቀ” አንድ ገዳም “ድንግልናን ማስወሰድ” እንደታላቅ ስዕለት ይቆጠራል፡፡በአይኔ በቦታው ተገኝቼ እንዳየሁት ስዕለቱን ለማስፈጸም የሚቆሙ አመንዝራ ወንዶች በአከባቢው የክብረ በዓሉ ዕለት ጥግ ጥግ ይዘው “ባዕለስዕለትን” ሲጠይቁ የማፈር እንግዳ ጠባይ ፈጽሞ አይታይባቸውም፡፡ ይህ እየሆነ ያለው በአውሮፓ ወይም በአሜሪካ በሚገኝ አንድ ቤተ እምነት ውስጥ አይደለም፤እዚሁ “ቅድስት የክርስቲያን ደሴት” ብለን በምንሸልልባት ኢትዮጲያ ውስጥ ነው፡፡ምናልባት ይህን በአዋጅ ቤተ ክርስቲያን አልፈቀደችም ብለው የሚሟገቱ እንዳሉ አምናለሁ፤እውነት ነው ቤተ ክርስቲያን አልፈቀደችም፣አትፈቅድም፡፡


ዳሩ ግን ፈጻሚዎቹና አስፈጻሚዎቹ የራሷ የቤተ ክርስቲያን አካላት አይደሉምን? የሚፈጸመውስ እርሷ ባዘጋጀችው ክብረ በዓልና ሥፍራ አይደለምን? በጉያዋስ ይዛ የእኔ አማኞች ናቸው ብላስ የምትጠራቸው አይደለምን? ስለምንስ በግልጥ መክራ ፣ዘክራ፣ አስታማ ፣አገላብጣ አልመለስ ካሉ ለይታ አታወግዝም? ከነውራቸውስ እስኪመለሱ ለምን ከምዕመናን አንድነት “ከቅድስቲቱ ህብረት” አትለይም? እውነት ዝሙት ከመናፍቅነት አንሶ ነውን? የየትኛው ትንሽ እባብ መርዝ ነው ነድፎ የማይጎዳ? የትኛውስ ትንሽ ኃጢአት ነው የቤተ ክርስቲያንን ቅድስና የማያረክስ?
      አዎ! አለቅጥ እንደቆሮንቶስ ቤተ ክርስቲያን ታብየናል(1ቆሮ.5÷2)፡፡የእግዚአብሔርን ጸጋ በአገባብ በእውነት መረዳትና ማስተዋል ካለመቻላችን የተነሳ አርነታችንን ለኃጢአት ተጠቅመንበታል፡፡በክርስቶስ የተሰጠንን ከኃጢአት ነጻ የመውጣት አርነት ለሥጋ ኑሮአችን ምክንያት እንዲሆነን አልነበረም፡፡
     ዳኛው ቀን ካፋታት ሴት ጋር ማታ ያመነዝራል፣ካህኑ ከንስሐ ልጁ ጋር ሚስቱን ተደብቆ ይማግጣል፣ ወጣቱ ዝሙትን እንደአንድ የ“ማደግ ምልክት” ቆጥሮታል፣አሮጊቶቹ በፌዛቸው የጥንት “አተራማሽነታቸውን” እንደደህና ወግ ያወሩታል፣ፊልሞቻችን ዝሙትን በፍትፍት ፊት የዝሙት መርዝ ሰንገው ያቀርቡታል ፣ሆቴሎቻችን የደሩትና የደመቁት በዝሙት ወዝ ነው… በዝሙት ምክንያት የሚመጡ በሽታዎች ፈውስ አልባ መሆናቸውን እያየን እንኳ ተጠይፈን ለመሸሽ አቅም አጥተናል፡፡
    በጥንት የሮማ ከተማ ጎዳናዎቿ የደመቁት ለዝሙትና ለጣዖት አንገዛም ያሉ ውድና ውብ የክርስቶስ ሰማዕታት ሰውነታቸው በሰም እየተነከረ በሚለኮስባቸው እሳት ነበር፡፡ዛሬ ግን የሀገራችን ታላላቅ ከተሞች በሌሊት “የሚደምቁት” እንደዝንጀሮ ለዝሙት በሚጓተቱ አመንዝሮችና ጋለሞታዎች ነው፡፡ ቀን ቢሮና ከትዳር አጋራቸው ጋር የሚውሉት ማታ መሸታ ቤት አድረው ማለዳ ኪዳንና ቅዳሴ፣ ጸሎትና ስዕለት ይዘው ሲመጡ ላየ ወይ ፍጻሜያችን ያስብላል፡፡አዎ! የከተሞቻችንና “የታላላቅ” ሆቴሎቻችን ሌሊት መዓትና መቅሰፍትን የሚጣራ ነው፡፡ሐገሬ ከእንቅልፍሽ ማን ባነቃሽ!!!
       ቤተ ክርስቲያን ከተሰጣት ሥልጣን ትልቁ አንድ አስነዋሪ ተግባር የፈጸመ ሰው በመካከልዋ ቢገኝ በጌታችን በኢየሱስ ኃይል፣በቃሉና በመንፈስ ቅዱስ አማካይነት በድርጊቱ ተጸጽቶ ንስሐ በመግባት እንዲመለስ ከምዕመናን አንድነት ልትለየው እንደምትችል ነው፡፡የምትለየው የኃጢአተኛው መንፈሱ በጌታ ቀን በተባለችው ዳግም ምጽአት ትድን ዘንድ ከእግዚአብሔር ህዝብ ለይታ ክፉኛ እንዲቀጣ ወደሰይጣን ግዛት በመስደድ ነው፡፡ ምክንያቱም ጥቂት እርሾ ብዙውን ሊጥ ያበላሻልና፡፡በክርስቶስ አዲስ ፍጥረት ሆኖ እርሾ ክፉ ኃጢአት የማያውቅ ንጹህ ሊጥ አለ፡፡(2ቆሮ.5÷17)፡፡
     ይህ ሐሳብ የመንፈስ ቅዱስ ሐሳብ ነው፡፡ጥቂቱ እርሾ ብዙውን ንጹህ ሊጥ ያቦካዋል፡፡ጥቂቱም የኃጢአት እርሾ ንጹሑን የአማኞች ህብረት ያረክሰዋል፡፡በዚህም ያለእድፈት ልትኖር የተጠራችው ቤተ ክርስቲያን በእድፈት ትያዛለች፡፡እግዚአብሔር አብ ስለኃጢአት ዋጋ ውድና ተካካይ የሌለው ልጁን ጨክኖ በቀራንዮ ላይ እንደበግ አርዶታል፡፡በውኑ በልጁ እንዲህ የጨከነ ጌታ አብ ዛሬ ቤተ ክርስቲያን ስለምትሰራው ኃጢአት የማይጨክን የማይፈርድ ይመስላችኋልን? እንደልቤ ያለውን(ሐዋ. 13÷22)ዳዊትን ዝሙት በፈጸመ ጊዜ እንዴት ባለ ቅጣት ነው የቀጣው?(2ሳሙ.12÷9-12)፡፡
      ለምን ነው እንዲህ ያለ ነውር በመካከላችን እያለ ዝምታው? ስለምንስ ነው ኃጢአትን ኃጢአት ነው ማለት የተሳነን? ከእንደነዚህ አይነት ሰዎች ጋር ምግብ እንኳ እንዳንበላ ታዘናል(1ቆሮ.5÷11) ምክንያቱም እውነተኛ አማኝ ከእነዚህ ሰዎች ግንኙነቱን ባጠበቀ ቁጥር አምላኩን ያስነቅፋል፤ሌሎችም ደግሞ ቤተ ክርስቲያን እንዲህ ያለውን ርኩሰት የምትቀበል ሊመስላቸው ይችላልና፡፡
     ቤተ ክርስቲያን እንደጌታ ትምህርት በግልጥ የመቆጣት፣ የመገሰጽና የማስተካከል ኃላፊነት አለባት፡፡ (ማቴ.18÷15)፡፡እገሌ፣እገሊት፣እነእገሌ … “መናፍቅ” ናቸው የሚለው ድፍረታችን በቅድስና ስፍራና አከባቢ አይን ያወጣ አመንዝራነታችንንም ለመገሰጽ አይናችን ይገለጥ፤ከንፈራችንም ይከፈት፡፡ይህም ከመናፍቅነት የማይተናነስ ከባድ የሥጋ ሥራ ነውና፡፡(ገላ.5÷21)
         ጌታ ሆይ ቤተ ክርስቲያንን ዳግም በጸጋህ በሚበዛ ቅድስና አጎልምሳት፡፡አሜን፡፡