የሕጻኑን ነፍስ የሚፈልጉት (ማቴ.2÷20)

Read in PDF

     በሥጋ ከእናቱ ከቅድስት ድንግል ማርያም የተወለደው ኢየሱስ፥ ዓለምን ብቻውን ሊያድን ብቃት ያለው አዳኝ፣ መሲህ ክርስቶስ ሆኖ የሰውን ልጅ ሊያድን ተገልጧል፡፡ ነቢዩ "ሕጻን ተወልዶልናልና …"(ኢሳ.9÷6) ያለውን ያንን ሕጻን፥ ማቴዎስም ሕጻን ብሎ ይጠራዋል፡፡ ይህ ሕጻን ገና ሳያድግና አንደበቱን ከፍቶ ሳይናገር የንጉሥ ፍርሐት፤ የዲያብሎስ ጭንቀት ሆነ፡፡ ኢየሱስ ገና የሁለት ዓመት ሕጻን ቢሆንም፥ ጎልማሳው ሄሮድስ ግን የመግደል ሴራን በስውር ጠነሰሰ፡፡ ጠላት ዓላማ ቢስ ከሆነ ሽማግሌና ጎልማሳ ይልቅ ዓላማ ያለውን ሕጻን በአላማ አጽንቶ ይዋጋል፡፡ ጉዳዩ አላማ እንጂ ዕድሜ አይደለምና፡፡

      የሁለት አመት ሕጻን በሰው ፊት ትርጉም ላይሰጥ ይችላል፡፡ እግዚአብሔር ግን እጅ በአፍ እስክንጭን  በድንቅ ቃል ምስጢር ያወራዋል፡፡ በነቢዩ ሳሙኤልም የሆነው እንዲህ ነው፡፡ እግዚአብሔር ታላላቅ ነን ከሚሉት ጋር ሳይሆን ስለእስራኤል ጉዳይ ከሁለት አመቱ ብላቴና ጋር ያወራ ነበር፡፡ ዓለማውያንና የመቅደሱ አገልጋዮች በእግዚአብሔር ላይ በኃጢአት ሲያምጹ እግዚአብሔር ሳሙኤልን በትሑት ቃል ተናገረው፡፡

       አገልግሎት በዕድሜ፣ በዕውቀት፣ በንግግር ጥበብ፣ በሰው ብልሐት … እየመሰላቸው ስንቶች ናቸው ዛሬም ሕጻናትን የሚያሳድዱ? ቀሚስ ስላልለበሱ፣ መስቀል ስላልጨበጡ፣ ጎምለል እያሉ መድረክ ስላልሞሉ፣ ሰው ጎንበስ ቀና እያለ "ስላልሰገደላቸው" … የተረሱና የተጣሉ ስንት አገልጋዮች አሉ? እግዚአብሔር የሁለት ዓመት ሳሙኤልን መርጦ ካህናቱን አፍኒን፣ ፊንሐስንና ዔሊን የናቀው ለምን ይመስላችኋል?  አገልግሎት የእግዚአብሔር መገለጥ እንጂ ሹመትና እድሜ፣ ሰዋዊ ብልሐትና ሜዳዊ ሥርአትን ማሟላት ስላልሆነ ነው፡፡ ሰላሳ፣ አርባ አመት "በእግዚአብሔር ቤት" ተቀምጠውና አገልግለው ኖረናል እያሉ እግዚአብሔርን የማያውቁ ሰዎች ብታገኙ ምን ይሰማችኋል? አዎ! አገልጋይነትና አማኝነት በመገለጥ የመኖር ጉዳይ እንጂ ዕድሜ የመቁጠር ጉዳይ አይደለም፡፡

       ጠላት ዓላማን እንጂ ዕድሜን አይፈራም፡፡ ስለዚህ ሄሮድስ ኢየሱስን ለማግኘት ኢየሱስን የማያውቁትን የቤተልሄምና የአውራጃዋን የሁለት አመት ህጻናት በሙሉ አስገደለ፡፡ የቤተ ልሔም ሕጻናት ኢየሱስን አያውቁትም ግን በእርሱ ስም ተገደሉ፡፡ ኢየሱስን የማያውቁ በስሙ ግን መከራን የሚቀበሉ ዛሬም ቁጥራቸው ትንሽ እናዳይመስላችሁ፡፡ "ኢየሱስ ያድናል"፣ "ኢየሱስ ፈራጅ ነው"፣ "ኢየሱስ ጌታ ነው" … የሚሉ ግና እንዴት እንደሚያድን፣ እንዴት እንደሚፈርድ፣ ለምን ጌታ እንደተባለ የማያውቁ አብርሆተ መንፈስ ቅዱስ የሌላቸው ጯሂ ደቀ መዛሙርት ዛሬም በጭፍኑ እይታቸው ክብር የሌለውን መከራ ሲቀበሉ ማየት ያሳዝናል፡፡

       ብዙዎቻችን በወንድና በሴት ፍቅር ታምተን የምንደሰተውን ያህል በክርስቶስ ኢየሱስ ስም መታማትን አንፈልግም፡፡ ግና መነቀፋችን፣ መጠላታችን፣ መታማታችን፣ ከሰው መካከል መወገዳችን … በስሙና በስሙ በማመን ካልሆነ በቀር ከንቱ ድካም ከንቱ ትምክህት ነው፡፡ ደቀ መዛሙርቱ ያለኢየሱስ በሌላ በማንም ስም አልተነቀፉም፣ አልተሰደቡም፣ መከራንም አልተቀበሉም፡፡ (ሐዋ.4÷2 ፤ 5÷40 ፤ 7÷52 ፤ 17÷3)፡፡ ጌታም ለሚያምኑቱ በስሙ ብቻ መከራን ቢቀበሉ፣ ስሙን እያገለገሉ ውሸት ሲናገሩባቸው ቢታገሱ የሚጠብቃቸውን ክብር ገልጦላቸዋል፤ (ማቴ.5÷11)፡፡ እኛም የኪዳኑ ተካፋዮች ነንና ከስሙ በቀር በሌላ በማንምና በምንም ስም መከራ ልንቀበል አይገባንም፡፡

      ሄሮድስ በዋናነት የፈለገው አንዱን የናዝሬቱን ሕጻን ኢየሱስን ነው፡፡ ነገር ግን በመልአኩ አንደበት እንደተነገረ "የሕጻኑን ነፍስ የፈለጉት ሞተዋል"፤ (ማቴ.2÷20) ተባለ፡፡ የሚገርመው እውነት ይህ ነው! ሕጻኑ ሀያላን ነገስታትን፣ ጽኑአን ገዳዮችን …ያስረጀና ያደከመ ነው፡፡ ሁልጊዜ ብርቱ የሚመስል የባላጋራ እጅ ከገለባ ይልቅ ቀሎ፣ እንደተወዘወዘ መስዋዕት ሲዝል አይተናል፡፡ የይሁዳው አንበሳ የናዝሬቱ ሕጻን ግን ሸሽቶ ያሸነፈ በብርታቱም ኃይለኞችን ያዋረደ ነው፡፡

      ልጁን የሚያሳድዱ በእርጅና ሞት ተይዘው በመቃብር ይወሰናሉ፡፡ የልጁ መንግስት ግን በሰማይና በምድር የጸናች ናት፡፡ የእውነትን ወንጌል የሚቃወምና የሚያሳድድ ጉልበት እስኪገርመን ድረስ ይዝላል፡፡ ወንጌላችን ግን ገና የጠላትን ግዛት ምርኮ ያለድካም ይሰበስባል፡፡ በአሰቃቂነቱ ወደር ያልተገኘለትን የማርቆስ አውሬሊያኖስን(161-180 ዓ.ም)የክርስቲያኖችን የስደት ዘመን ያየን እንደሆን ስለት የጨበጡት የገዳይ ወታደሮች እጅ ዛለ እንጂ የስሙን ምስክርነት የተሸከሙና የሚሸከሙ ዕለት ዕለት ይጨመሩ ይበዙም ነበር፡፡

      አዎ! በሄሮድስ የተገፋውና የተጠቃውን ሕጻን "እግዚአብሔር ያለልክ ከፍ ከፍ አደረገው ከስም ሁሉ በላይ ያለውን ስም ሰጠው…"(ፊሊ.2÷9)፡፡ እንኪያስ የምታምኑ ሁሉ ደስ ይበላችሁ፡፡ የሚያሳድዷችሁ በገዛ እጃቸው መቃብራቸውን አዘጋጅተው ለሞት ሲቸኩሉ፥ ለእናንተ ግን የክብርን ሰገነት እያዘጋጁላችሁ ነው፡፡

   "የሕጻኑን ነፍስ የሚፈልጉት የሞቱ" ቢሆኑም ዛሬ የሌሉ ግን አይደሉም፡፡ ዛሬም ወንጌልን የተሸከሙ እውነተኛ አገልጋዮችን ነፍስ ፈልገው የሚያሳድዱ፣ ስም የሚያጠፉ፣ የሚወግሩ … አሉ ግና ሁሉ የሚዝሉ የሚያረጁ፣ በሞትም የተገደቡ ናቸው፡፡በስሙ የተጠቃችሁና የተናቃችሁ ግን ደግሜ  እላለሁ ደስ ይበላችሁ የናዝሬቱ ሕጻን ቀን አውጥቶላችሁ በአሳዳጆቻችሁ ፊት በሞገስ ያራምዳችኋል!!!

    የሕጻኑን ነፍስ የሚፈልጉ ይሞታሉና ሕጻኑን የምትሰብኩ ያለፍርሐት አሁኑኑ ተነሱ ኃይል የህጻኑ ማዳንም የክርስቶስ ብቻ ነውና፡፡ ጌታ ማስተዋልን ያብዛልን፡፡ አሜን፡፡