ክርስቲያን ያልሆኑት ኦርቶክሳውያን ወይስ ምህረተ አብ?! (ክፍል አንድ)

     Please read in PDF

     “ለትምህርትና ለተግሣጽ ልብንም ለማቅናት በጽድቅም ላለው ምክር” (2ጢሞ.3፥16) የእግዚአብሔር መንፈስ ያለባቸውን የብሉይ ኪዳን መጻሕፍትንም ሆነ የአዲስ ኪዳን መጻሕፍትን መንፈስ ቅዱስ ለእኛ የሰጠው፥ “ኢየሱስ እርሱ ክርስቶስ የእግዚአብሔር ልጅ እንደሆነ እናምን ዘንድ፥ አምነንም በስሙ ሕይወት ይሆንልን ዘንድ” ነው፡፡ (ዮሐ.20፥30-31)

      የመጽሐፍ ቅዱስ ትምህርት አንድና አንድ ፤ ግልጽና ግልጽ እንጂ ስውርና ውስብስብ ፣ ለሰዎች እንዳይገባና እንዳይረዱት ተደርጎ የተጻፈ አይደለም፡፡ መጽሐፍ ቅዱስ የሰው ልጅን የማዳን ተስፋና ተስፋው በኢየሱስ ክርስቶስ መምጣት ፤ መሞትና መነሳት የተፈጸመ መሆኑን በማስረዳት ይህን መዳን የምሥራች ብለን ለፍጥረት ሁሉ በድፍረት ከመንፈስ ቅዱስ ጉልበት የተነሳ እንድንናገር እንጂ ሌላ ስውር አጀንዳ የለውም፡፡ ጌታችን የመምጣቱን ምስጢር ራሱ ሲናገር፥ “እኔ ሕይወት እንዲሆንላቸው እንዲበዛላቸውም መጣሁ” (ዮሐ.10፥10) ሲል ፤ ደቀ መዛሙርቱም ፤ “ኃጢአተኞችን ሊያድን ክርስቶስ ኢየሱስ ወደዓለም መጣ የሚለው ቃል የታመነና ሁሉ እንዲቀበሉት የተገባ ነው” (1ጢሞ.1፥15)  በማለት መሰከሩ፡፡ ለቤተ ክርስቲያንም የተሰጠው ትልቁ ተልእኮና አደራ “ሂዱና አሕዛብን ሁሉ በአብ በወልድና በመንፈስ ቅዱስ ስም እያጠመቃችኋቸው፥ ያዘዝኋችሁንም ሁሉ እንዲጠብቁ እያስተማራችኋቸው ደቀ መዛሙርት አድርጓቸው” የሚል አለም አቀፍ ጥሪና ሰፊ የመከር ሥራ ነው፡፡ (ማቴ.28፥19)

     ዛሬ ዛሬ የምንሰማቸው “ሰባክያንና መምህራን” የሚበዙቱ “የሐናን ለወለተ ሐና” እየሰጡ የሚያገለግሉ ኃላፊነት የጎደላቸው ናቸው፡፡ ለመጽሐፍ ቅዱስ አውዳዊ ትርጉም የማይገዙ ብቻ አይደሉም ፤ ከመጽሐፍ ቅዱስ ያልሆነውንም ትምህርት ሲናገሩ ከራሳቸው አፍልቀው ወይም አጋንንትን እያደመጡ ይናገራሉ፡፡ (1ጢሞ.4፥1-2) እንዲህ ያሉ  “ሰባክያንና መምህራን” ነን ባዮችን ትምህርታቸውንና ስብከቶቻቸውን እየተከታተሉ መልስ መስጠትና ምላሽ ማዘጋጀት ሁለት ተግዳሮት አለው፡፡

1.     ትምህርታቸውን “እንደኢየሱስ” የተቀበሉላቸው ብዙ ደጋፊዎች አሏቸውና፥ አገልግሎታችንን ሁሉ የተቃውሞና የጥላቻ ያደርጉታል ፤

2.    በደጋፊዎቻቸው መጠን ትምህርቶቻቸውም ብዙና ብዙዎቹም የክርስትና መሠረትና እውነት የሌላቸው ከመሆኑ አንጻር በእያንዳንዱ ላይ መልስ መስጠት እጅግ ሊቸግር ይችላል፡፡

     ይሁንና እንዲህ አፈንግጦ የወጣውን ግን መመለስና ሐሰተኝነቱን ማጋለጥ የተገባና መጽሐፍ ቅዱሳዊም ነው፡፡ እንዲህ የምለው በነገር ለመጠዛጠዝ ከማሰብ አንጻር ሳይሆን “ምነው የቅዱሱን ቃል ሥልጣን ይህን ያህል ተጋፋን? … ምነው በአገባቡ መተርጎም ባንችል በአገባቡና በሥርዓት ብናነበው? “ከማይረባ”  ተርጓሚ ኮልታፋ አንባቢ ይሻላል” ለሚለው ብርቱ ሃሳብ ድጋፍ ለመስጠትና በትርጉም አስባብ ቃሉን ለማያከብሩት ደግሞ “እግዚአብሔራዊ የቃሉን ሃሳብ” በድፍረት ለመናገር ነው፡፡ በእርግጥም ሕዝብ እልል እያስባሉ እንዲህ ያለውን አጸያፊ ትምህርት ለማስረጽና እንግዳ ትምህርት፥ መድረኩንና አውደ ምሕረቱን በ“ነጻ” ስላገኘን ብቻ እንደማወጅ የሚከብድ ነገር ምን አለ!?

                          (ፊልሙ ለማየት እዚህ ጋ ተጭነው ይመልከቱ …)

    እንግዲህ “ምህረተ አብ ወዳስተማረው” ትምህርት ስናመራ በሁለት ዋና ዋና ርዕሶች ላይ እጅግ ትኩረት ማድረግን መርጫለሁ፡፡ በዋናነት እኒህን የመረጥኩት በእኒህ በሁለቱ ትምህርቶች ምልከታዎች ላይ ስህተቱ ያፈጠጠና ያገጠጠ መሆኑን ለብዙዎች በማሳየት ሰዎች ሁሉ ፊታቸውን ወደቅዱስ ቃሉና ወደእውነተኛው መምህር ወደመንፈስ ቅዱስ ዘወር እንዲያደርጉ ለማድረግ ነው፡፡

በእውኑ እኛ የተፈጠርነው ከአባታችን ከአፈርና ከአያታችን ከውኃ ነውን?!

    እግዚአብሔር ሰውን የፈጠረው በመልኩና በአምሳሉ ነው፡፡ ወንድም ሴትም ሁለቱም የእግዚአብሔር መልክና አምሳል ናቸው፡፡ መልክና አምሳል እብራይስጡ (ፀሌምና ዳማት) የሚላቸው እኛ ከእግዚአብሔር ጋር ያለንን ፍጹም ተዛማዶና ትስስር እንዲሁም የእግዚአብሔር ፍጹም እጅ ሥራዎች መሆናችንን ያስረግጣል፡፡ ይህም ከእግዚአብሔር ጋር ኅብረት ለማድረግና ምላሽ ለመስጠት የሚያስችለን ነው፡፡

      ስለዚህም በብሉይ ኪዳንም ሆነ በአዲስ ኪዳን መልክና ምሳሌ የሚሉት ቃላት ተመሳሳይ ፍቺ ያላቸው ብቻ ሳይሆኑ፥ አዳምና ሔዋን መንፈስ ፣ አእምሮ ፣ ስሜት ፣ ምንነትን የማወቅ እንዲሁም የመምረጥ ችሎታ የነበራቸው ሰብአዊ አካላት ሆነው ሆነው የተፈጠሩ መሆናቸውንም ያሳያል፡፡ ከዚህም ባሻገር ደግሞ አምሳልና መልክ ጽድቅንና ቅድስናን (ኤፌ.4፥24) እንዲሁም እውቀትንም (ቈላ.3፥1) አካቶ የያዘ መሆኑንም ማስተዋል እንችላለን፡፡

     እግዚአብሔር ይህንን መልክና አምሳል ለሰው ልጆች የሰጠው ከራሱ ባሕርይ እንጂ ከእንሰሳ ወይም ከሌላ ፍጡር በማዛመድ ወይም በመዋስ አይደለም፡፡ ምክንያቱም እግዚአብሔር ወደፊት ሊገለጥበት ያሰበውን መልክና አምሳል በሰው እንዲሆን ወዷልና፡፡ (ዘፍጥ.18፥1-2) ክብር ይግባውና ልጁም የሰው ልጅን ሊያድን ሲመጣ የሚይዘው መልክ፥ “የአብርሃምን ዘር ይዞአል እንጂ የያዘው የመላእክትን አይደለም።” (ዕብ.2፥16) እንዲል የሰውን እንጂ የሌላውን እንሰሳ ወይም ግዑዝ አካል ማንነት በመንሳት አይደለምና፡፡ (ሉቃ.1፥35 ፤ ዮሐ.1፥14 ፤ ሮሜ.8፥3 ፤  2ቆሮ.8፥9 ፤ ፊልጵ.2፥7 ፤ ዕብ.10፥5)

     እንዲሁም እግዚአብሔር የሰውን ልጅ እጅግ በፍጥረቱም ማግነኑን የምናየው “እግዚአብሔርም ፦ ሰውን በመልኩ ፈጠረ በእግዚአብሔር መልክ ፈጠረው ወንድና ሴት አድርጎ ፈጠራቸው።” (ዘፍጥ.1፥27) በሚለው ቃሉ ነው፡፡ አስተውሉ! “ፈጠረ” ፣ “ፈጠረው” ፣ “ፈጠራቸው” የሚሉት ቃላት ተራ ድግግሞሽ አይደሉም፡፡ እግዚአብሔር በስድስተኛው ቀን የሰው ልጅን ሲፈጥር የሠራው ሥራ ትልቅና ልዩ መሆኑን ለማመልከት እንጂ፡፡ ወንድና  ሴት ሁለቱም በእግዚአብሔር መልክ ተፈጥረዋል ስንል የመለኮትን ባሕርይ ተካፋይ ይሆኑ ዘንድ ተወደዋል ማለት ነው፡፡ (2ጴጥ.1፥4) በእርግጥም አማኝ ክርስቲያኖች የክርስቶስን መልክ እንዲመስሉ አስቀድሞ እግዚአብሔር ወስኖአል፡፡ (ሮሜ.8፥29) አንድ ቀንም እርሱን እንድንመስል እናውቃለን፡፡ (1ዮሐ.3፥2) ይህ ሚስጢር እጅግ ውብና ተስፋችንን በመቃተት እንድንጠብቅ የሚያደርግ ነው!!!

     እግዚአብሔር እንዲህ አልቆና አግንኖ የፈጠረውን የሰውን ልጅ መልኩና አምሳሉ ስላለበት እንዲከበር እንጂ እንዲገደል (ዘፍጥ.9፥6) ፤ እንዲረገምም አልወደደም፡፡ (ያዕ.3፥9) እጅግ የሚመስጠውና የሰውን ልጅ እጅግ ታላቅነት የሚያሳየው ሌላው ድንቅ አባባል፥ “እግዚአብሔር አምላክም ሰውን ከምድር አፈር አበጀው ፤ በአፍንጫውም የሕይወት እስትንፋስ እፍ አለበት ፤ ሰውም ሕያው ነፍስ ያለው ሆነ፡፡” (ዘፍጥ.2፥7) የሚለው ነው፡፡ ይህ ቃል ምንም እንኳ የሰው ልጅ ከእንሰሳት ጋር አካላዊ ተመሳሳይነት እንዳለው ቢናገርም ነገር ግን ከእግዚአብሔር ጋር ልዩ ግንኙነት የመሠረተበትና በእንሰሳትና በምድር ተንቀሳቃስ ሁሉ ላይ የበላይና ገዥ መሆኑን የሚያመለክት ነው፡፡ ስለዚህ በሰውና በእንሰሳት ፤ በግዕዛንም መካከል ከፍ እጅግ ከፍ ያለ ልዩነት አለ፡፡ (መዝ.8፥5-8)

    ይህ እውነት “አባታችን መሬት ፣ አያታችን ውኃ” በሚል ዋዘኛና ፌዘኛ ትምህርት የሚቀለድበት አይደለም፡፡ በቀደመው አዳም የቀደመው መልካችን ሲበላሽ እንኳ እግዚአብሔር ከዚህም በላይ አልቆ ምንም ዳግመኛ “እኛ ፍጥረቱ ነንና ፤ እንመላለስበት ዘንድ እግዚአብሔር አስቀድሞ ያዘጋጀውን መልካሙን ሥራ ለማድረግ በክርስቶስ ኢየሱስ ተፈጠርን” (ኤፌ.2፥10) እንደተባለ አዲስና ከአሮጌው ሰው ጋር ምንም አይነት ግንኙነት የሌለን (2ቆሮ.5፥17 ፤ ኤፌ.4፥22 ፤ ቈላ.3፥2) የእግዚአብሔር የእጁ ምርጥ ሥራዎች ነን እንጂ የውኃና የአፈር ግኝቶች አይደለንም፡፡ ሕያው የሚያደርግ ቅዱስ መንፈስና ከኃጢአት ሁሉ የሚያጠራ የኢየሱስ ደም (1ዮሐ.1፥7) አለንና ውኃ ፤ ውኃ አንልም ፣ አፈር ፤ አፈርም አንሸትም፡፡ 

ይቀጥላል …