ቃሉ የሚለው፥ “ከቶ አላወቅኋችሁም ፤” ነው!

     

Please read in PDF

   በመጽሐፍ ቅዱስ በአገባቡ ወይም እንደተጻፈው ከማይነበቡ ጥቅሶች መካከል አንዱ፦ “ … ከቶ አላወቅኋችሁም ፤ እናንተ ዓመፀኞች ፥ ከእኔ ራቁ ብዬ እመሰክርባቸዋለሁ።” (ማቴ.7፥23) በማለት የተጻፈልን ቃል ነው፡፡ ይህ ክፍልና ሌሎችም ከዚሁ ጋር የተያያዙም ንባባት ለአፈጻጸም ከፍ ያለ የሥነ ምግባርና የፍጽምናን መንገድ ይፈልጋሉ፡፡ ከዚህም የተነሳ ብዙዎች የተራራው ትምህርት ተብለው የሚታመኑትን ቃላት ማንም ሰው መፈጸም እንደማይቻለው ያስተምራሉ፡፡ በእርግጥም የእግዚአብሔርን ማናቸውንም ሥራ በእግዚአብሔር ጉልበት ፤ ራሱ እግዚአብሔርንም መማር የሚቻለን በራሱ በእግዚአብሔር ዕውቀት ገላጭነትና የጥበብ አስተማሪነት ነው፡፡ ይህ ማለት ግን የተራራውን ትምህርት በራሱ በእግዚአብሔር ጉልበትና መንፈስ መፈጸም ይቻለናል ማለት እንጂ ፈጽሞ መፈጸም አይቻልም ማለት አይደለም፡፡

     ጌታችን መድኃኒታችን ኢየሱስ ክርስቶስ በተራራው ትምህርቱ ያስተማራቸው ትምህርቶቹ በብዙዎች ዘንድ እጅግ የተደነቁና የሚያስደምሙ ትምህርቶች ናቸው፡፡ እውነትም! የእግዚአብሔር አምላካችን መንገድና ሕጉ ፤ ሥራውም ፍጹም ነውና (ዘዳግ.25፥15 ፤ መዝ.18፥30 ፤19፥7) ፤ እኛም በእርሱ ዘንድ (ዘዳግ.18፥13) ፤ እንደእርሱም ፍጹማን እንሆን ዘንድ ተጠርተናል፡፡ (ዘፍጥ.17፥1 ፤ ማቴ.5፥48 ፤ 19፥21) አዎን! የእግዚአብሔር ቅዱሳንም በፊቱ ያለነውርና ነቀፋ ነበሩ፡፡ (ዘፍጥ.6፥9 ፤ 1ነገ.11፥4 ፤ ኢዮ.1፥1 ፤ ሉቃ.1፥6 ፤ 2፥25) ፍጽምና ወይም በእግዚአብሔር ፊት የበቃ ሆኖ መገኘት ለሰው የሚቻል ነገር አይደለም (ሮሜ.3፥11 ፤ 2ቆሮ.3፥5) ስለዚህም ስለፍጽምናና ቅድስና ስናስብ በክርስቶስ ኢየሱስ በኩል በተሰጠን ጸጋ እንጂ (ሮሜ.3፥21-24) በሕግ ወይም በራሳችን የምናደርገውም ፤ እናደርገውም ዘንድ የሚገባን አንዳችም ነገር የለም፡፡

     “በጌታችንና በመድኃኒታችን በኢየሱስ ክርስቶስ እውቀት ከዓለም ርኵሰት ካመለጥን በኋላ ዳግመኛ በእርስዋ ተጠላልፈን የተሸነፍን እንዳንሆን ፥ ከፊተኛው ኑሮአችን ይልቅ የኋለኛው የባሰ እንዳይሆንብን” (2ጴጥ.2፥20) በእግዚአብሔርና በሰው ሁሉ ፊት ጨውና ብርሃን ሆነን (ማቴ.5፥13-14) ፤ በምስክርነት ሕይወት እንመላለስ ዘንድ ይገባናል፡፡ አንድ ክርስቲያን በሁሉ ዘንድ የሚነበብና የሚታይ ልብና ሕይወት ብቻ ነው ሊኖረው የሚችለው (2ቆሮ.3፥2) ፤ ለአንድ ሰውም ሁለት ጌታ በአንድ ሕይወት ማስተናገድ ፈጽሞ አይቻልም፡፡ (ማቴ.6፥24) እንደዳነ የሚያምን ክርስቲያን የዳነ ሥራና ሕይወት ብቻ ነው ከእርሱና በእርሱ ሊነበብ የሚችለው እንጂ በሁለት ልብ አያነክስም፡፡ (1ነገ.18፥21)

       እውነተኛ ክርስቲያኖች ክርስቶስን ሲያገለግሉ የበግ ለምድ አይለብሱም (ማቴ.7፥15) ፤ ወይም በሚያስመስልና በሚያባብል ቃል ክርስቶስን አያገለግሉም (1ቆሮ.2፥4) ፤ በመልካምና በሚያቆላምጥ ንግግርም ተንኮል የሌለባቸውን ሰዎች ልብ አያታልሉም (ሮሜ.16፥18) ፤ ለሰው ፊት በማድላትም አያመቻምቹም (ሐዋ.4፥19 ፤ 13፥46) ፤ የብርሃን መልአክ በመምሰልም ራሳቸውን አይለውጡም፡፡ (2ቆሮ.11፥14) ከዚህም የራቁ ናቸው፡፡ (ቈላ.2፥4) ሰይጣንና አገልጋዮቹ ማሳትን አላማቸው አድርገው የሚኖሩ ፦ “የክርስቶስን ሐዋርያት እንዲመስሉ ራሳቸውን እየለወጡ፥ ውሸተኞች ሐዋርያትና ተንኮለኞች ሠራተኞች” (2ቆሮ.11፥13)ሆነው እኒህን ሁሉ “በጥበብና በዘዴ” በሚገባ ይጠቀሙበታል፡፡

ሰይጣንን (ራዕ.13፥5) ፣ ሆዳቸውን (ሮሜ.16፥18 ፤ ፊልጵ.3፥18) ፣ የራሳቸውንም ታላቅነት (ሐዋ.8፥9) የሚሰብኩ ወይም በእነዚህ ነገሮች ፍጹም ተሸንፈው ወይም ስለነዚህ ነገሮች በመዋደቅ የሚያገለግሉ አገልጋዮች፥ ጌታችን እንደነገረን “… በስምህ ትንቢት አልተናገርንምን፥ በስምህስ አጋንንትን አላወጣንምን፥ በስምህስ ብዙ ተአምራትን አላደረግንምን? … ” (ማቴ.7፥22) የሚሉ ብቻ ሳይሆኑ ፦ “እሳትንም እንኳ ከሰማይ ወደምድር በሰው ፊት እስኪያወርድ ድረስ ታላላቆችን ምልክቶች ማድረግ” (ራዕ.13፥13) ይቻላቸዋል፡፡ በዚህ የበግ ለምድ አለባበሳቸውና ፤ በብርሃናዊ ፍጹም የገጽ መልካቸው ብዙዎችን ማሳትይ ችላሉ ፤ ያስታሉም፡፡

     እኒህ ሰዎች ብዙ ተአምራትን ፤ ውብ የሆኑ መጻሕፍትና ጹሁፎችን ፤ አጋንንትን ሊያወጡ ፤ ለምጽን ሊያነጹ ፤ እጅግ ግለት ያለውን ስብከትና ትምህርትን ሊያቀርቡ ፤ አፍ የሚያስከፍት ንግግሮችና አስደናቂ ነገሮችን ሊያደርጉ ይችላሉ ፤ ነገር ግን “ይህም ድንቅ አይደለም” ይለናል ሁነኛው ሐዋርያ፡፡ (2ቆሮ.11፥14) በእርግጥም “ይድኑ ዘንድ የእውነትን ፍቅር ስላልተቀበሉ ለሚጠፉ፥ የእርሱ መምጣት በተአምራት ሁሉና በምልክቶች በሐሰተኞች ድንቆችም በዓመፅም መታለል ሁሉ እንደሰይጣን አሠራር ነው።” (2ተሰ.2፥9-10)

     እኒህ ሰዎች አጋንንትን ቢያወጡ ፣ ተአምራትን ቢያደርጉ ፣ ብዙ ብዙ ነገሮችን ቢያደርጉ ፥ የሚያደርጉትን ሁሉ የሚያደርጉት “በስሙ” ነው፡፡ በስሙ ስለሚያደርጉም ላያቸውና ለሰማቸው ፤ ወይም ጽሁፎቻቸውን ላነበበ እስኪያስቱና ሥራዎቻቸው ከእውነተኞቹ መለየት እሰኪያስቸግር ድረስ አንድ ሊመስል ይችላል፡፡ ነገር ግን“…መንሹም በእጁ ነው፥ አውድማውንም ፈጽሞ ያጠራል፥ ስንዴውንም በጎተራው ይከታል፥ ገለባውን ግን በማይጠፋ እሳት ያቃጥለዋል።” (ማቴ.3፥12) የተባለለት ጌታ አንዳች ሳይሳሳት ሥራቸውን ከእውነተኞቹ ይህ ለይቶ ያቃጥለዋል፡፡

     እግዚአብሔር በስሙ የሚመጡትን ሐሰተኛ አገልጋዮችን አያውቃቸውም ፤ እነርሱ እንደታወቀ ሆነው ወይም የታወቅን ነን ብለው ሊያገለግሉ ይችላሉ፡፡ ዛሬ ላይ በእርግጥም እንዲህ አይነት አገልጋዮች ከየትኛውም ጊዜ ይልቅ እጅግ የበዙበትና እንደአሸን የፈሉበት ጊዜ ላይ ነን፡፡ በብሉይ ኪዳን እንዲህ አይነት አገልጋዮች እንደነበሩ እናያለን፡፡ እኒህ የሐሰት አገልጋዮች በእውነተኛ አገልጋዮች ላይ የሚያሳድሩት ተጽዕኖ ቀላል አይደለም፡፡ እኒህ አገልጋዮች በበዙበት ሥፍራ እውነተኛ አገልጋዮች ሥፍራ የሚያጡ ብቻ ሳይሆኑ የሚናገሩት አንድም ነገራቸው በሕዝብ ዘንድ ሙሉ ለሙሉ ዕውቅና ሊያጣ ይችላል፡፡

      ቅዱስ ነቢይ ኤርምያስ አልቃሻ ነቢይ እስኪባል ዘመኑን ሙሉ ሲያለቅስና ሲያዝን የኖረው፥ እርሱ የተናገረውን እውነተኛ ትንቢት የሐሰት ነቢያት በመግልበጥ ሕዝቡን በእርሱ ላይ ጠላት አድርገው በማስነሳታቸው ምክንያት ነው፡፡ እርሱ ከእግዚአብሔር ዘንድ ንስሐ ባልገቡበት ኃጢአታቸው ምክንያት የተቆረጠ ፍርድ እንዳለ ቢናገርም ፤ የሐሰት ነቢያቱ ግን ለእስራኤል ቅዱስ ላልታመነችው ከዳተኛይቱ እስራኤልና ለዐመጸኛው ሕዝብ ሰላም ብቻ እንዳለ ይናገሩ ነበር፡፡ ሁልጊዜ የጠላት ማስመሰያ ከባድና ለመለየት አስቸጋሪ እስኪመስል ሊያደናግር ይችላል፡፡ ነገር ግን ዘወትር ቃሉን ለሚመረምርና በጸሎት ለተጋ ብርቱ ሰው፥ በጽድቅ እርሻ ላይ ያለውን እንክርዳድ መለየት አያስቸግረውም፡፡

      እስኪ አንድ እውነተኛ ምሳሌ እናንሳ ፦ በአንድ ወቅት ቅዱስ ጳውሎስና የጌታ ደቀ መዛሙርት ወደጸሎት ሥፍራ ሲሄዱ አንዲት ጠንቋይ እነቅዱስ ጳውሎስን እየተከተለች ፥ “የመዳንን መንገድ የሚነግሩአችሁ እነዚህ ሰዎች የልዑል አምላክ ባሪያዎች ናቸው” እያለች ለብዙ ቀናት ተናገረች፡፡ አስተውሉ! የተናገረችው ቃል እውነትና ትክክል ነው፡፡ ነገር ግን ምንጩ ፍጹም የተበላሸ ነው፡፡ እንዲህ ያለውን ንግግር በሌላ ስፍራም እናስተውላለን፡፡ (ማር.1፥34 ፤ ሉቃ.4፥41) ምንጩ ካልጠራበት ሥፍራ የሚመጣውን ምስክርነት መንፈስ እጅግ አድርጎ ይቃወመዋል፡፡ ቅዱስ ጳውሎስ ያቺ ሴት ባደረገችው ነገር መንፈሱ እጅግ ነው የታወከው ፤ ለዚህም ነው፥ መንፈሱን እንዲወጣ በጌታ በኢየሱስ ስም ያዘዘው፡፡

     ሰይጣን ሥራው እጅግ ረቂቅ ቢሆንም ለእግዚአብሔር መንፈስ ግን የክፋት አሠራሩ የተገለጠ ነው፡፡ ስለዚህም የጌታ ኢየሱስ ስሙን በመጥራት ብቻ አማኝ ወይም አገልጋይ መሆን አይቻልም፡፡ ሊያስትበት ስሙን ሰይጣንም ይጠቀመዋልና፡፡ ራሳቸውን በክርስቶስ በኩል ለእውነት የሚያበቃና በክርስቶስ የሆነ እውነተኛ እምነት የሌላቸው እንዲህ ያሉ አገልጋዮችን እግዚአብሔር ፈጽሞ አያውቃቸውም ፤ በዳግም ምጽአቱ የሚላቸው፥ እኛ እንደምናነበው “አላውቃችሁም” ሳይሆን፥ “ከቶ አላወቅኋችሁም” ብሎ ነው፡፡ የማያውቃቸው ያኔ በፍርዱ ጊዜ ሳይሆን ቀድሞ በዚህ ምድር ባሉበት ጊዜ ማለትም ያገለግሉ በነበረበት አያውቃቸውም፡፡

     ወገኖቼ! ማን እንደሚያውቀን እየኖርን ሆን?! ሰው እንደሚያውቃቸው የሚያገለግሉ የእግዚአብሔር መሳይ እልፍ ባለቀሚስና ባለካባ ፤ ባለአስኬማና ባለወይባ ካህንና ዲያቆን ፤ ጳጳስና ዘማርያን አሉ፡፡ እናንተ ግን ማን እንደሚያያችሁ ይሆን ያመናችሁትን እያገለገላችሁ ያላችሁት? ብዙ ደክሞ በጌታ አለመታወቅ ትልቅ ኪሳራ ፤ ጥቂት እጅግ በጣም ጥቂት አገልግሎ ግን በጌታ መታወቅ ከመቶ እጥፍ የሚበልጥ ትልቅ ትርፍ ነው፡፡ ጌታ ኢየሱስ ሆይ ለባርያዎችህ እንዲህ ያለውን ማስተዋል አብዛልን፡፡ አሜን፡፡