“ዘማሪት” ትርሃስና “ወደ ኋላ አልልም ከእንግዲህ” የሚለው መዝሙሯ!

 Please read in PDF

“አልወጣሁም እያልሽኝ ነው፤ … እያልሽ ያለው ነገር ግን እየተዋጠልኝ አይደለም፤ እየተቀበልኹትም አይደለም … ” ይህን የተናገረው ቃለ መጠይቅ ያደረገላት ልጅ ነው፤ ጌታ ኢየሱስን የሚያፍሩበት ኹሉ እንዲህ ሊዋረዱና ሊያፍሩ ይገባቸዋል! በልጁ የሚያፍር፣ በምድር ማንም ባያምነውና “ንግግርህ አይዋጥልኝም” ቢለው ትክክል ነው፤ ትርሃስ እንዲህ ስትባይ ምን ተሰምቶሽ ይኾን? በኢየሱስ አፍረሽ ማን እንዲመሰክርልሽ ወደሽ ነበር?!

እንዲህ ዘምራ ነበር!

 “ወደ ኋላ አልልም ከእንግዲህ

ስላየሁህ ፊቴ ተስለህ

ከተገለጥክልኝ ሕያው ተድላ

አልሻም በጭራሽ ካንተ ሌላ።

… የማልሸቅጥብህ ንዑድ ጌታ

የማልደርብብህ ንጹህ በፍታ።

አንተን ያሉትን በጽኑ ስከስ

መች ተጸየፍከኝ በዕንባ ስመለስ

ደማስቆ ሳልደርስ ደርስህልኝ

የጽድቅህን ጦር አስታጠቅኸኝ”

ይህን መዝሙር ዘምራ ነበር፤ አዎን ዘምራ ነበር!

የኋሊት እንሽርት!

ከቅርብ ጊዜ ወዲህ ከ“ሐዳስያን ጋር እያገለገልን ነበር፤ አኹን ግን ትምህርታቸውና ሕይወታቸው ትክክል አይደለምና ከእነርሱ ተለይተናል ወይም ደግሞ ጨርሶ ከእነርሱ ጋር አልነበርንም” የሚሉ ዘማርያንና ሰባክያንን እየሰማን ነው። ከእነዚህ ውስጥ አንዷ ደግሞ ከሰሞኑ ትርሃስ ገብረ እግዚአብሔር ኾና መጥታለች። “አብሬ አገለገልኩ እንጂ አብሬአቸው አልነበርኩም” ስትልም አብረዋት የነበሩትንና “ዝማሬ የሰጧትን” ወንድሞችና እህቶችን ሽምጥጥ አድርጋ ክዳለች። እንዲህ ማድረግ ግን ለምን ፈለገች?[ሌሎችስ ለምን ይህን መንገድ ይከተላሉ?] ብዬ ብጠይቅ፣ ጎልቶ የሚሰማኝ ድምጽ አንድና አንድ ብቻ ነው። በስሙ ያፍራሉ። አንዳንዶች፣ ልብስ፣ እንጀራ፣ መኖሪያ፣  የአውሮፓና የአሜሪካ መኖሪያ ፈቃድ ለማግኘት፣ የገንዘብ እጦት፣ ራብና ጥምን መታገሥ አለመቻል፣ የትዳር ዋስትና ስለሌላቸው … ሊሉ ይችላሉ፤ ግን በስሙ ያመነና የማያፍር አማኝ የቱንም መከራ ይታገሣል፤ ነገር ግን ኹላቸውን ይህን አይወዱም፤ ምን ብንል?

በስሙ መከራ መቀበልን አይፈልጉም፦ ወደ ኋላ የሚንሸራተቱ ኹሉም አገልጋዮች ቀዳሚ ነገራቸው በማርያም ስም እንጂ በኢየሱስ ስም መከራ መቀበል አይፈልጉም። በኢየሱስ ሲታሙ ያፍራሉ፣ በማርያም ስም ግን ማናቸውንም ነገር ደፍረው ይናገራሉ፤ ሲዘምሩም አያፍሩም። በኢየሱስ ግን ይሸማቀቃሉ፤ አንገት ይደፋሉ። የሚዘምሩት የተሰጣቸውን እንጂ ያመኑበትንና የሚኖሩትን አለመኾኑን መመለሳቸው ይመሰክራል!

መጽሐፍ ቅዱስ በግልጥ ቃል መከራንና ነቀፋን ኹሉ መቀበል ያለብን በኢየሱስ ስም መኾኑን እንዲህ ይናገራል፣ “ሲነቅፉአችሁና ሲያሳድዱአችሁ በእኔም ምክንያት ክፉውን ሁሉ በውሸት ሲናገሩባችሁ ብፁዓን ናችሁ።” (ማቴ. 5፥11)፣ “ሰዎች ስለ ሰው ልጅ ሲጠሉአችሁ ሲለዩአችሁም ሲነቅፉአችሁም ስማችሁንም እንደ ክፉ ሲያወጡ፥ ብፁዓን ናችሁ።” (ሉቃ. 6፥22)፣ “እኔን አሳደውኝ እንደ ሆኑ እናንተን ደግሞ ያሳድዱአችኋል፤ ቃሌን ጠብቀው እንደ ሆኑ ቃላችሁን ደግሞ ይጠብቃሉ። ዳሩ ግን የላከኝን አያውቁምና ይህን ሁሉ ስለ ስሜ ያደርጉባችኋል።” (ዮሐ. 15፥20-21)፣ “ሐዋርያትንም ወደ እነርሱ ጠርተው ገረፉአቸው፥ በኢየሱስም ስም እንዳይናገሩ አዝዘው ፈቱአቸው። እነርሱም ስለ ስሙ ይናቁ ዘንድ የተገባቸው ሆነው ስለ ተቈጠሩ ከሸንጎው ፊት ደስ እያላቸው ወጡ፤ …” (ሐዋ. 5፥41)።

“ስለዚህ በሰው ፊት ለሚመሰክርልኝ ሁሉ እኔ ደግሞ በሰማያት ባለው በአባቴ ፊት እመሰክርለታለሁ፤ በሰው ፊትም የሚክደኝን ሁሉ እኔ ደግሞ በሰማያት ባለው በአባቴ ፊት እክደዋለሁ።” (ማቴ. 10፥32-33)

“ወደ ኋላ አልልም” ብላ ብትዘምርም፣ ወደ ኋላ በመመለስ ልክፍት ተይዛለች፤ የኋሊትም ሸምጥጣ ተመልሳለች፤ ነገር ግን ትርሃስም ኾነች ሌሎችን እንዲህ እንላለን፤ በስሙ መከራ መቀበልን የምታፍሩ ሆይ፤ መንገደኛ ኹሉ እንደሚያሳፍራችሁ፤ እንደሚያዋርዳችሁ፤ ይህን እውነት ደፍሬ እናገራለሁ። ጌታ ግን በታማኝነቱ በዙፋኑ አለ፤ እስከ መጨረሻ ለሚጸኑት አክሊልና ሕይወትን ይሸልማል፤ አሜን።