እኔን ዛሬ ማረው!

 Please Read PDF

ጉብዝናዬን ላ’ጢአት ፣ ብርታቴን ለነውር ፤

ውበቴን ለወጥመድ ፣ አውዬ የማድር ፤

እኔ ነኝ ጌታዬ ፣ እኔ ነኝ ፣ እኔ ነኝ፤

በግ ከሚያርዱ ጋራ ፣ እሳት ስሞቅ ’ምገኝ፡፡

ለነፍስ የማልራራ ፣ ውርጃ አስወራጁ፤

ዶሮ ሳይጮኽ ሦስቴ ፣ በሽምጥጫ ካጁ፤

ሸክም የከበደው ፣ ቀንበር ያጎበጠው ፤

እኔ ነኝ ኢየሱስ ፣ እኔን ዛሬ ማረው!!!

ቀኑ ሲቀላላ ፣ ወደወይን ጠጁ፤

ድንግዝግዝ ሲል ደግሞ፣  ከመሸታ ደጁ፤

በስካር በፍትወት ፣ ነድጄ ከስዬ፤

’ምኖር ዕድሜ ልኬን፣ ከፊትህ ኮብልዬ፤

እኔ ነኝ ያ ቃየል ፣ እኔ ነኝ ይሁዳም፤

ወድቀው ከቀሩቱ ፣ ከታሪክ ’ማልማር፡፡

ኃጢአት በአመክንዮ ፣ እየተረጎምኩኝ፤

ከመለየት ይልቅ፣  እየተቋመርኩኝ፤

ጽድቅ በሚመስል ፣ ክፋት ተከብቤ፤

ከመልካም ተራቁቶ ፣ የጠቆረው ልቤ፤

ለእኔ ነው ጌታዬ ፣ መድኃኒት የሚያሻው፤

ኃጢአት ጉንድሽ አ’ርጎ ፣ ጉልበቴን ለነሳው፡፡

የተትረፈረፈ ፣ የበዛ ይቅርታ፤

እኔን ነው ’ሚገባኝ ፣ የሞትክልኝ ጌታ፤

ከኃጢአት ጋር ቁማር ፣ ዕቃቃዬን ትቼ፤

ስመጣ ወ’ዳንተ ፣ እጆቼን ዘርግቼ፤

ትዝብት በማያውቀው ፣ በምህረት ፊትህ፤

ተቀበለኝ ጌታ ፣ በምትወደው ልጅህ ፣ ተቀበለኝ ስልህ፡፡

ተንከባሏል ከ’ኔ ፣ ያ ሁሉ ኃጢአቴ፤

በልጁ ስላየን ፣ ልጁን ውዱ አባቴ፡፡ አሜን፡፡