ሆሳዕና ለርሱ

Please read in PDF

ከብርሃናት ዙፋን የአህያ ጀርባ

ከወርቅ ምንጣፍ ይልቅ መናኛ ዘንባባ

ከሊቃውንት ይልቅ የህፃናት አፍላ

ወዶ የመረጠ እንደ ማር ወለላ

ዝቅ ዝቅ ብሎ ውርንጫይቱን ሽቶ

ባማረ ሰገነት መቀመጥን ትቶ

ሠላማዊ ነቢይ የሰላም አለቃ

በሚጠቡ ህፃናት ለመመስገን በቃ፡፡

በፍርድ ምልክት እሾሀማ ዘንባባ

በፈውስ ትዕምርት በልስልሱ ወይራ

ታጅቦ በህጻናት በአላዋቂዎች

ታየ መድሀኒዓለም ድንቁ የምስራች

ቃል አካላዊ ቃል ሰማያዊ

ድሀ የማትረሳ ደግ ሣምራዊ

ሆሳዕና ላንተ አሁን ለምታድን

ለነፃነት ጌታ ለምትፈታ እስርን

ርቃችሁ የምትቆሙ ሊቀ ሊቃውንቱ

ተከፍቶ ዕልፍኙ የልባችሁ ቤቱ

ምስጋናውን አብዙ ለከበረ ስሙ

ለትሁቱ ጌታ በትህትና መንፈስ እናንተም ተቀኙ፡፡

ህፃን አፍን ከፍቶ

ድንጋይ ድምጽ ሠጥቶ

ድርቡን ምስጋና ቅኔ ከተቀኘ

እናንተ ታላላቅ ምነው ቀኝ ዐይናችሁ ክፉ ተመቀኘ?

ሆሳዕና ለርሱ ላዳነን መከታ

በክንፎቹ ጥላ ላሳረፈን ጌታ፡፡