ማርያም “የጌታ ባሪያ” መባልዋ ያዋርዳታልን?

 Please read in PDF

በመጽሐፍ ቅዱስ ከቀረቡ ተወዳጅ መዝሙራት መካከል፣ የማርያም መዝሙር አንዱ ነው፤ የቅድስት ማርያም ዝማሬ የሚጀምረው እግዚአብሔርን በማመስገን ነው (ሉቃስ 1፥46)። እግዚአብሔርን ስታመሰግንም፣ የአዳኝነት ሚናውን በግልፅና በትህትና በማሳየት ነው (ሉቃስ 1፥47)። መዝሙሮቿም ከቅዱሳት መጻሕፍት ማለትም ከብሉይ ኪዳን ምንባባት የተቀዱና የተወሰዱ ናቸው።

ማርያም ዝማሬዎቿን የወሰደችው በአብዛኛው ከነቢየ እግዚአብሔር ልበ አምላክ ዳዊት ነው። ንጉሥ ዳዊት፣ ለደካሞች፣ ለተሰበሩ፣ ለተጐዱ ሰዎች ትኵረት በመስጠት እግዚአብሔርን ያከብራል (መዝ. 136፥23፤ 138፥6)። ዓለም ለባለጠጎችና ባለ ሥልጣናት ትኵረት ብትሰጥም፣ እግዚአብሔር ግን ዓለም ችላ የምትላቸውን ሰዎች ይመለከታል። ከዚህ የተነሣ ቅድስት ማርያም፣

“የባሪያይቱን ውርደት ተመልክቶአልና። እነሆም፥ ከዛሬ ጀምሮ ትውልድ ሁሉ ብፅዕት ይሉኛል፤” (ሉቃ. 1፥48)

በማለት ትዘምራለች። አዎን ማርያም፣ ገናና ዙፋን ከነበረው ከንጉሥ ዳዊት ወገን ብትኾንም ያ ቤተሰብ ግን ለብዙ ዓመታት ፈርሶ፣ በታላቅ መከራ ውስጥ እያለፈ ነበር፤ ርስዋም ከዳዊት ንጉሣዊ ቤተሰብ የተገኘች ብትኾንም፣ ኑሮዋና መታጨትዋ አናጺ ከኾነ ሰው ዘንድ ነበር። ዳዊትን ከበጐች በረት በእስራኤል ላይ ንጉሥ እንዲኾን የመረጠው ያ ጌታ፣ ርስዋንም ከተዋረደችው መንደር ከናዝሬት ገሊላ መረጠ። ጌታ እግዚአብሔር ዝቅ ያሉትን ከፍ ከፍ በማድረግ ደስ ይለዋል፤ ጥበበኞችን እንዲያሳፍር የዓለምን ሞኝ ነገር ይመርጣል፥ ኃያላኑንም እንዲያሳፍር የዓለምን ደካማ ነገር ሁሉ የተናቀውንም ይመርጣል፤ ምክንያቱም ሥጋ የለበሰ ኹሉ በፊቱ እንዳይመካ፣ (1ቆሮ. 1፥27-29)።

ቅድስት ማርያም፣ የአምላክዋን መድኃኒትነት በመፈለግና በማግኘት ደስተኛ እንደ ኾነች ትናገራለች፤ ስለዚህም የተስፋው ፍጻሜ “ለአብርሃምና ለዘሩ ለዘላለም ምሕረቱ ትዝ እያለው እስራኤል ሊረዳ እንዳለ” በማስተዋልዋ ማለትም፣ እግዚአብሔር በመሲሑ በኩል ተስፋውን ኹሉ እንደሚፈጽም በማሰብ በአምላክዋ ከመደሰት በቀር ሌላ የደስታ ምክንያት እንደማይኖራት አወቀች። ለዚህም ነው የመልአኩን ብሥራት በመቀበል፣ “እነሆኝ የጌታ ባሪያ እንደ ቃልህ ይሁንልኝ” (ሉቃ. 1፥38) በማለት በፍጹም ትህትና የተቀበለችው።

ከዚህም የተነሣ፣ መልአኩ ገብርኤል (ሉቃ. 1፥30) እና ቅድስት ኤልሳቤጥ (ሉቃ. 1፥42) ማርያም መሲሑ በሥጋ ለመገለጡ “በተጫወተችው ሚና” ከጌታ የተለየ በረከት እንዳገኘች ተናግረዋል። ድንግል ማርያም የእግዚአብሔርን ልጅ መውለድ ትልቅ ክብር እና ኃላፊነት እንደ ኾነም ተረዳች። ይህ ትልቅ ሞገስም “ብፅዕት” እንደሚያስብላትም ተናገረች፤ አዎን በርግጥም ብፅዕት፤ ንዑድ የተመረጠች ናት፤ የጌታን ሥራ ፈቅዳ በመቀበል ታዝዛለችና።

ከዚህ በተቃራኒ ግን ኦርቶዶክሳውያንና ካቶሊካውያን ማርያምን በተመለከተ ያላቸው አቋም፣ ከመጽሐፍ ቅዱስ አንጻር ሲታይ አያሌ ግር የሚያሰኝ ነገር አለው። ማርያም ራስዋን ለእግዚአብሔር ሥራ በመገዛትና በመታዘዝ የገለጠችውን “የማገልገልና የባሪያነትን” ሕይወት የተለያየ ስያሜ በመስጠት፣ ከጌታ ጋር ሲያስተካክሏት አልያም ከፍጡራን ኹሉ የተለየች ፍጥረት ሲያደርጓት ይስተዋላል።

መጽሐፍም ራስዋ ድንግል ማርያምም እንዳለችውም ግን፣ ርስዋ የጌታ ባሪያ ናት፤ ባሪያ መኾንዋ አንዳች የሚቀንስባት ነገር የለም፤ ይልቅ ለእግዚአብሔር ፈቃድና ዐሳብ መታዘዝዋንና ለመፈጸምም እሺ ባይ መኾንዋን ያሳያልና። አስተውሉ፤ አንድም ሰው ክርስቶስ ኢየሱስ እኛን ስለ ማዳን ባደረገው የማዳን ሥራ፣ “ባሪያና አገልጋይ” ተብሎ ሲጠራ አይከፋውም፤ መጽሐፍ ስለ መሲሑ ሲናገር፣ “የባሪያን መልክ ይዞ በሰውም ምሳሌ ሆኖ ራሱን ባዶ አደረገ፥” (ፊል. 2፥7) ሲል፣ ማንም አይከፋውም፤ ምክንያቱም ራሱ ክርስቶስ፣ “የሰው ልጅም ሊያገለግልና ነፍሱን ለብዙዎች ቤዛ ሊሰጥ እንጂ እንዲያገለግሉት አልመጣም።” (ማር. 10፥45) ብሎአልና። እንደ ባሪያ የታዘዘው ጌታ በሰማያት በግርማው ቀኝ “በሰማይና በምድር ከምድርም በታች ያሉት ሁሉ በስሙ ይንበረከኩለት ዘንድ፥” ኹሉን አሸንፎ በሰማያት አለ፤ እናም የታዘዘው ባሪያ በነቢዩ አንደበትም እንዲህ ተብሎለታል፤ “ደግፌ የያዝሁት ባሪያዬ፤ ነፍሴ ደስ የተሰኘችበት ምርጤ፤ … ጻድቅ ባሪያዬም በእውቀቱ ብዙ ሰዎችን ያጸድቃል፥ ኃጢአታቸውን ይሸከማል።” (ኢሳ. 41፥1፤ 53፥11)።

ያዳነን ጌታ በመታዘዙ ባሪያ ተብሎአል፤ ማርያም “የጌታ ባሪያ” ብትባል በትክክል ለእግዚአብሔር ባሪያ ኾና እንጂ ሔዋንን ወክላ ወይም ሳትኾን ቀርታ አይደለም! እግዚአብሔር ምንም እንኳ ያዳነንና የወደደን ቢኾንም ኹላችንም ወደን የተገዛንለት ባሪያዎቹና አገልጋዮቹ ነን! ይህን መኾን አንዳች ውርደት የለበትም!

“ጌታችንን ኢየሱስ ክርስቶስን በማይጠፋ ፍቅር ለሚወድዱ ሁሉ ጸጋ ይሁን።” (ኤፌ. 6:24) አሜን።