ለኃጢአት ከተሰጠ ሰውነት
ሞት ሞት ከሚሸት ማንነት
አልጋ ሲሉት ከሚል ቀጋ
ሁሌ ከሚቃትት ሁሌ ከሚሰጋ
ጥላን ከሚከተል ንፋስ ከሚጎስም
ሕማም ደዌ ሀሳር ከበዛበት ዓለም
ማን ነው የሚያድነኝ? ኃይሉን ክንዱን ሰብሮ
ከንቱ ከተባለ ከአለማመን ኑሮ …
የሞት ዕልልታ ከነገሰበት
ሰይጣን በክፋት ከአጊያጌጠበት
ኃጢአት ድር ቤቷን ከሠራችበት
ሥር መሠረቷን ካፀናችበት
ማን ያድነኛል? ከመቃተቴ
ማን ይሰማኛል? ይህን ጩኸቴ፡፡
ጽድቅ ከሚሠለች ከድካም መንፈስ
ማለዳ ቀድሶ አመሻሽ ከሚረክስ …
የመርገም ዕጭ አብቅሎ
የጽድቅ ጫጩት ገድሎ …
ከድንግዝግዝ ጉዞ ካልጠራ ዕይታ
ከሰካራም ጠባይ ከዚያ ክፉ ጌታ
ማነው የሚያድነኝ? ብዬ አልታወክም
ልቤን አላደክምም አቅሌን አልበትንም
አለልኝ መከታ የተዘረጋ ክንድ
ቀራንዮ ጎልጎታ ውዴ እኔን በወውደድ …
ሸክሜን ተሸክሞ ርስቴን ያሰፋልኝ
ወዶ በፈቃዱ ሞቴን የሞተልኝ
ጌታ ኢየሱስ ነው በክንዱ ያዳነኝ፡፡
No comments:
Post a Comment