አያሌ ዲያስፖራ ዛሬም ጥሙ፣ ረሃቡ፣ ናፍቆቱ ግብረ ሰዶማዊነት ነውን?!

   Please read in PDF

    ጥቂት ያይደለው ዲያስፖራው ኢትዮጵያዊ ማንነቴ ግብረ ሰዶማዊ ነው ይላል፤ የክፋት ጥጋችን መገለጫው ይህ ነው፤ እሳትን ከሰማይ አዝንም ልመናችን ይህ ነው፤ ነውር ይከበርልን፤ ዕድፈት ይጽደቅልን፤ ርኩሰት ይደንገግልን፤ ከእንሰሳነት ማነስ ይረጋገጥልን የሚል ዓመጸኝነት በምድራችን እንዲነግሥ እንዲህ ተግተው የሚሠሩ አሉ፤ ምድርን ካላረከሱ የማያርፉ፤ ግልሙትናና ሴሰኝነት፤ አመንዝራና ዝሙት ያላረካቸው ትውልድና ተፈጥሮን ካልተቃረንኩ ብለው ይሞግታሉ፤ ግብረ ሰዶማዊነት እንደ ቅድስና ሕጋዊ ይኹንልን፤ ተገፍተናልና አቁሙን የሚሉ ተማኅጽኖዎች እያየሉ መጥተዋል።

ይህን ፎቶ ሳይ ውስጤን መግለጥ የማልችለው ቁጣና እንባ ተናንቆኛል፤ ብሔርተኝነትን ገና ማሸነፍ ላልቻለች አገር ሌላ ቀንበር የሚመኙላት አሉ፤ በአሜሪካ፣ በካናዳና በአውሮጳ ተቀምጠው ከዘርና ከወንዝ ብሔርተኝነት ያልተላቀቁና በዚህ ጸያፍ ሥራቸው ያልረኩ እልፍ ዲያስፖራዎቸው ሌላ የነውርና የኃጢአት የቤት ሥራ እያበጁልን ነው፤ ግብረ ሰዶማዊነት። ማን ይኾን ከትውልዱ ያስተዋለ?! ከምዕራቡ ዓለም አብያተ ክርስቲያናት ይልቅ ምነው የእነዚህ ነውረኞችና እጅግ ምድርን አስጨናቂ ኃጢአተኞች ድምጻቸው ጮኾ ይሰማል? አባቶች ጳጳሳት፣ ሰባክያን፣ ነገረ መለኮታውያን፣ የሰንበት ትምህርት ቤት አገልጋይና ተማሪዎች፣ የሰባካ መንፈሳዊና የስብከተ ወንጌል አባላት፣ መጋብያን፣ ቆሞሳት፣ ቀሳውስትና ዲያቆናት፣ አስተማሪዎች … ወዴት ናችሁ? ትውልድ በቁመቱ ልክ ወድቆ ምድር ፊቷን በርኩሰት ሳታጨማድድ ጨክናችሁ ተነሡ!!!

ዲያስፖራ ግብረ ሰዶማውያንም ሆይ! ምድሪቱን አታስጨንቋት፤ በንስሐ ተመለሱ፤ ጌታችን ኢየሱስን እንደ ገና እመኑት፤ ተቀበሉት፤ ዳኑበትም፤ በደሙም ታጥባችሁ ንጹ፤ ተቀደሱም፤ አገልጋዮችም ለትውልዱ እውነተኛውን የጽድቅና የመዳን ወንጌል ስበኩ፤ የወንጌሉን ቃል አሰምታችሁ ጩኹ፤ ሳትቆጥቡ ጩኹ! ጌታ እግዚአብሔር ምድራችንን ያስባት፤ ኢትዮጵያና ኤርትራ ሆይ! እግዚአብሔር ይማራችሁ፤ ምሕረትን ያድርግላችሁ፤ አሜን።