መልዐከ መዊዕ አባ የማነ ብርሐን ካሳሁን አፈርንሎት!

Please read in PDF

      በቀን 24/3/10 8:30 ገደማ በሻሸመኔ ከተማ ማኅበረ ኢየሱስ ባዘጋጀው ጉባኤ ላይ ቀሚሳቸውን ለብሰው መስቀላቸውን ጨብጠው እንደጉባኤው እድምተኛ ከሌሎች ቀሳውስት፣ ዲያቆናትና ሰንበት ተማሪዎች ጋር በመኾን ልክ ጸሎት በሚጀመርበት ሰዓት ዱላና ድንጋይ አስጨብጠው ወደመድረኩ በመውጣት የያዙትን መስቀል ወደኪስዎ ከትተው ድብደባ ባርከው በማስጀመርዎ አፈርንሎት!

      እርስዎን የማውቅዎ በ2004 ዓ.ም እኔ በወንጌል ጉዳይ ተከስሼ በእርስዎ ፊት ቀርቤ በብዙ ጩኸት ይከሱኝ ከነበሩት ከሳሾች በተሻለ ለዘብተኝነት ሲናገሩ ሰምቼዎ ነበር፤ የዚያኔ ጌታ ልብዎን "ለወንጌል አለዝቦ የሥጋ ልብ" እንዲያደርግልዎ በልቤ ማልጄዎት ነበር፤[ዲያቆን ለአባ ቆሞስ መጸለይ ያልተለመደ ቢኾንም¡] ዳሩ ግን ልብዎ ደንድኖ ጆሮዎ ከመስማትና ከማስተዋል ችላ ብሎ፣ በአመጸኝነትና በማን አለብኝነት የእርስዎን የግብር ልጆች አስከትለው በመምጣት፣ ወንጌል ሊማማሩ የተሰበሰቡትን የገዛ ልጆችዎን፣ "ተሳስተዋል ቢሉ መክረው አስተምረው መመለስ ወይም ባይቻልዎ ከእርስዎ ለሚሻል አባት ማስመከር ሲገባዎ" እጅና እግር ሰንዝረው ተማትተው ደም በማፍሰስዎ አፈርንልዎት!

      በዘመናት ወንጌልን ለማቆምና ለማጥፋት፣ ለማሳደድም ብዙዎች ቄሣሮች፣ አውግስጦሶች፣ አጼዎች፣ግለሰቦች፣ ጳጳሳት፣ ኮሚኒስት መሪዎች፣ ጦር ያነገቱ ባለሥልጣናት ... በተደጋጋሚ ተነስተዋል፡፡ ነገር ግን እንኳን ሊያስቆሙ ስፋቱን የሰደድ እሳት ያህል ያለከልካይ እንዲፈጥን አደረጉት እንጂ ሊያስቆሙት ፈጽሞ አልተቻላቸውም፡፡ ወንጌልን ሊያጠፉ የተነሡ ሁሉ ራሳቸው ስም አጠራራቸው እስኪጠፋ ተረሱ እንጂ ወንጌልን ሊያስቆሙት ፈጽሞውኑ አልተቻላቸውም፡፡

      የወንጌል ተቃዋሚዎች ለጊዜው በወንጌል የሚያምኑትን ሊያስሩ፣ ሊያሳድዱ፣ ሊደበድቡ፣ አካላቸውን ሊያጎድሉ፣ ሊፈነከቱ፣ ሊሳደቡ፣ ሊሳለቁ፣ ሊዝቱ፣ ሊዘብቱ፣ ጉባኤ ሊያስተጓጉሉ፣ የጸሎት ቤቶችን ሊያዘጉ፣ የዜማ መሣሪያዎችን ሊሠባብሩ፣ እንደጉድፍ ሊቆጥሯቸው ...እንደሚችሉ እናውቃለን፡፡ ምናልባትም "ሥጋቸውንም መግደል ይችሉ ይኾናል" (ማቴ.10፥28)፤ ነገር ግን የእግዚአብሔር ቃል አይታሰርም፤ (2ቆሮ.2፥9)፣ እርስዎ ይህን ሃያል የእሳት ትንታግ በሥጋ አቅምዎ ሊይዙ በመነሣትዎ ስስ አቅምዎን አላወቁትምና አፈርንልዎት!

     ለዓለም ለመላእክትም ለሰዎችም መጫወቻ እንደኾንን፣ እግዚአብሔር እኛን አገልጋዮቹን  ሞት እንደተፈረደባቸው ሰዎች ከሁሉ ይልቅ የኀለኞች እንዳደረገን፣ ስለክርስቶስ ሞኞች፣ አሳቾች፣ ያልታወቁ፣ ኀዘንተኞች፣ ድሆች፣ አንዳች የሌለን ብንሆን ስለስሙ እንናቅ ዘንድ ይገባናልና፤ (1ቆሮ.4፥9፤ 2ቆሮ.6፥9፤ ሐዋ.5፥41) በዚህ እጅግ ደስተኞች ነን፤ (ማቴ.5፥11)፡፡ በሌላው ላይ እጁን የሚሰነዝር፣ ለመምታት የሚጋበዝ፣ የሚሳደብ፣ ሰውን የሚንቅ፣ የሚቆጣ ... እርሱ የተሸነፈና አቅመ ቢስነቱን በአደባባይ ያስመሰከረ ነው፡፡ እርስዎና አጋርዎችዎ እንዲህ ባለ ነውርና ሽንፈት በመያዝዎ አፈርንሎት!!!
      ለመኾኑ እንደእርስዎ የቱ ሐዋርያ ይኾን እጅ የሰነዘረው? የቱ ጻድቅ ነው እጁን ለቡጢ የጨበጠ? የቱ አባ ቆሞስ ይኾን የልጁን ደም ያፈሰሰ? የቱ ሰማዕት ይኾን ከመወገርና ከመደብደብ ይልቅ የወገረና የደበደበ? እርስዎ የማንን አሠረ ፍኖት ይኾን የተከተሉት? እንደኢየሱስና እስጢፋኖስ በሸላቶቹ ፊት ዝም እንደሚል በግ ዝምታን መምረጥ ከበደዎት ወይስ ጌታንና ሐዋርያትን በጥላቻና በንቀት እንዳሳደዱ አይሁድ "በታናናሾችዎ ላይ ተነሡ?!" ለመኾኑ ግን ምነው ወንጌል በጨበጡ ልጆችዎ ላይ ቀኝ ዓይንዎ ቀላ?!
      ወንጌል ኢየሱስ ነው፤ ወንጌልን ለማሰር መሞከር ኢየሱስን ጥፍንግ አድርጎ ለማሰር የመሞከር ያህል ነው፡፡ ስለዚህም በእርሱ የሚያምኑትን የሚያሳድዱና የሚጣሉ ጠባቸውና ጥላቸው ከራሱ ከኢየሱስ ጋር ነው፤ (ሐዋ.9፥4)፡፡ ኢየሱስን የሚቃወሙ ሁሉ ደግሞ በስለት ላይ የመቆም ያህል ይጎዳሉ፤ (ሐዋ.9፥5)፣ በዐለቱ ኢየሱስ ላይ የሚወድቅ ይቀጠቀጣል፣ ድንጋዩ የሚወድቅበትም ይፈጨዋል፤ (ማቴ.21፥44)፤ በፍጻሜው ደግሞ ከእግዚአብሔር ጋር የሚጣሉ ሁሉ ይደቅቃሉ፤ (1ሳሙ.2፥10)፡፡ ይህን ሳያውቁ ቀሚስ ለብሰው መስቀል ጨብጠው "ወዲ ተጋዳላይ" በመሆንዎ አፈርንሎት!
እኛ ለእርስዎ ያፈርነው ክርስቲያን ነኝ ብለው በአይ ኤስ አይ ኤስ ተግባር በመገለጥዎ ነው! የሊቢያ አሸባሪዎችና በሜድትራኒያን ባሕር ዳርቻ ወገኖቻችንን ካረዱ አሸባሪዎች እርስዎ ግን በምን ይለዩ ይኾን?! እጅግ አፈርንሎት!
     እንዲህ ያለ ነገር ሳያውቁ በማድረግዎ ብናፍርሎትም፣ ጌታ ምሕረትና ይቅርታ ለእርስዎና ለባልንጀሮችዎ እንዲያደርግልዎ እንማልዳለን፡፡ በስሙ መከራ ያገኛችሁ ሁሉ እንኳን ደስ አላችሁ! ጸጋና ሠላም በጌታችን ኢየሱስ ይብዛላችሁ፤ አሜን፡፡