አርባ ምንጭና ተሰሎንቄአዊ ልቧ

  Please read in PDF

በኹለተኛው ሐዋርያዊ ጉዞው፣ ቅዱስ ጳውሎስና ሲላስ ወንጌል በመመስከር ካለፉባቸው ከተሞች አንዷ ተሰሎንቄ ናት፤ “በአንፊጶልና በአጶሎንያም ካለፉ በኋላ ወደ ተሰሎንቄ መጡ፥ በዚያም የአይሁድ ምኵራብ ነበረ።” (ሐዋ. 17፥1) እንዲል፣ ወደ ተሰሎንቄ እንደ ገቡ ያደረጉት እንደ ልማዳቸው ከቅዱሳት መጻሕፍት እየጠቀሱ ወንጌልን ማስተማር ነበር። የቅዱስ ጳውሎስና ሲላስም የምስክርነታቸው ማዕከል “ይህ እኔ የምሰብክላችሁ ኢየሱስ እርሱ ክርስቶስ ነው” የሚል ነው፤ ምክንያቱም “ክርስቶስ መከራ እንዲቀበልና ከሙታን እንዲነሣ ይገባው ነበርና”።

 ወንጌል ማዕከሉ “ኢየሱስ እርሱ ክርስቶስ ነው” ማለት፣ ከቅድስት ድንግል የተወለደው ኢየሱስ እርሱ መሲህ፣ ብቃት ያለው ብቸኛ አዳኝ፣ አብ የረካበትና የተቀበለው ውድ መሥዋዕት፣ ለኃጢአታችን የሞተ ሊያጸድቀን ደግሞ የተነሣ ጌታና አምላክ ነው የሚል ነው፤ እርሱ ኢየሱስ ከድሃ ቤተ ሰብ የተወለደ ድሃ ብቻ አይደለም፤ ቤት ያልነበረው ከርታታ ብቻ አይደለም፤ ኀጢአተኞችን ወዳድ ርኅራኄን ገንዘብ ያደረገ ትሁት ብቻ አይደለም፤ ሲያዩት ምንም የማይወደድ ነገር ያለው የሚመስል ብቻ አይደለም፤ እርሱ ብቻውን አዳኝ፣ ብቻውን ፈዋሽ፣ ብቻውን አስታራቂ፣ ብቻውን መካከለኛ፣ ብቻውን ብቁ ቤዛ፣ የተትረፈረፈ ዋጆአችን ነው።

 ቅዱስ ጳውሎስ ይህን እውነት በተሰሎንቄ ባስተማረበት ወቅት፣ “ኢየሱስ እርሱ ክርስቶስ ብቃት ያለው አዳኝ ነው” በማለቱ፣ የግሪክ አሕዛብ ወገኖች ከቅዱስ ጳውሎስና ከሲላስ ጋር ተባበሩ፤ አመኑ። የተሰሎንቄ አይሁድ ግን ለሕጉ ቀንተው በጳውሎስና በሲላስ ላይ ክፉ የኾኑ ሥራ ፈቶችን ሰብስበው ከተማውን በማወክ ወደ ሕዝቡ አውጥተው ለመደብደብ ተነሳሱባቸው። እናም ጳውሎስና ሲላስን “ባላገኙአቸውም ጊዜ ኢያሶንንና ከወንድሞች አንዳንዶችን ወደ ከተማው አለቆች ጎትተው” አወጡአቸው። እናም ከተማውን ሠላም ነስተው ያወኩት እነርሱ ኾነው ሳለ፣ ቅዱሳን ሐዋርያትንና ያመኑትን ኹሉ ግን “ዓለምን ያወኩ እነዚህ ወደዚህ ደግሞ መጥተዋል፥” በማለት ከሰሱአቸው።

  ጠላት ዲያብሎስ ኹል ጊዜ የተሸነፈ መንገድን ይከተላል፤ ቅዱሳንን ሲያሳድድ፣ ስማቸውን ሲያጠፋ፣ በሐሰት ሲከስ፣ ሲደበድብ፣ ሊገድል ሲሞክር፣ ሲገድል … የሚያሸንፍ ይመስለዋል፤ በዚህም ድል እንደ ነሣ ሊቈጥር ይቃጣዋል። እናም ከልክ ያለፈ ኃይልን በመጠቀም የወንጌልን ሥራ ለማቆም፣ ለማሰር፣ እንዳይፈጥን ለማድረግ ይጥራል፤ በተቃራኒው ግን ወንጌልን በተቃወመበትና እንዳይሰበክ ባደረገበት ልክ፣ ወንጌሉ ከጫፍ ጫፍ በተቃውሞ ብዛት እንደሚናኝ፤ እንደሚያሸንፍ አያስተውልም። ሰይጣን ለዘመናት የሚወድቅበትና የሚሳሳትበት መንገድ ቢኖር ይህ ነው፤ ወንጌል እየተቃወመ በጥላቻ ወንጌልን ያሰብካል፤ ያስተዋውቃል።

  አርባ ምንጭ የኾነው እንዲህ ነው፤ ወንጌል ለማገልገል የሄዱትን ወንድሞች “ኦርቶዶክሳውያን ነን ያሉ ሥጋውያን ቀናተኞች” አስቀድመው ተዘጋጅተው በመግባት ንብረት ዘረፉ፣ ሰው ደበደቡ፣ ከተማ አወኩ፣ ወንድሞችን አሳሰሩ፣ ጉባኤውን በተኑ። እኒህ “ኦርቶዶክስን እንወክላለን” የሚሉ አካላት ለምን መደብደብን ልማድ እንዳደረጉ ይገባናል፤ ለምን ራሳቸው ከተማ አውከው “ሃይማኖታቻንን ደፈሩብን” እንደሚሉ እናውቃለን፤ ለምን ኹል ጊዜ በጥላቻ ቆመው ለማሸነፍ እንደሚጥሩ እንረዳለን፤ ወንጌል እንዲህ ባለ መንገድ እጅግ እንደሚበዛና እንደሚሰፋ ስለማያውቁ ነው። ወንጌል የተዳፈነ እሳት ነው፤ ሲነካኩት ይብስበታል እንጂ፤ ይጋጋማል እንጂ፤ ይንቦገቦጋል እንጂ ፈጽሞ አይጠፋም፤ አይከስምም፤ አይዳፈንም።

 መደብደብ፣ የሰውን ንብረት መንጠቅ፣ ማሳሰር፣ የሰውን አምልኮ መረበሽ፣ ማወክ … የሽንፈት ውጤት ነው። እውነተኛ አማኝ የክርስቶስ ልብ ስላለው የሞተ ነው፤ ክርስቶስ በመስቀል ላይ ኹሉን ማድረግ እየቻለ ምንም አላደረገም፤ የአባቱን ፈቃድ ለመፈጸም ፍጹም ታዛዥና እንደሚታረድ በግ ዝም ያለ ነበር። እውነተኛ ክርስቶሳውያን የሚሄዱበት መንገድ ይህ ነው፤ ክርስቶስ እየሞተ ሰይጣንን፣ ሞትን ኀጢአትን ድል ነሣ፤ እውነተኛ አማኝም እየሞተ፣ እየተሰደደ፣ እየተደበደበ፣ እየታሰረ፣ እየተነጠቀ፣ መብቱ እየተገደበ … ወንጌልን ይመሰክር ዘንድ ይገባዋል።

 በክርስቶስ ስም መከራ መቀበል ቅንጣት ታህል ውርደትና ሽንፈት አይደለም፤ አርባ ምንጮች ሆይ! በመደባበባችሁ፣ ንብረት በመዝረፋችሁ፣ ወንድሞችን በማሳሰራችን ያሸነፋችሁ አይደላችሁም፤ ይልቁን በጣም እጅግ በጣም የተሸነፋችሁና የተበለጣችሁ መኾናችሁን እመኑ። ኦርቶዶክሳዊት ቤተ ክርስቲያን በእንደ እናንተ አይነቱ ትሰደብ፣ ትወቀስ፣ ትተች፣ ትናቅ፣ ትዘለፍ፣ ትዋረድ፣ እንደኾን እንጂ ፈጽሞ አትከበርም፤ ትከስር እንደኾን እንጂ አንዳችም አታተርፍም።

   ባለፉት ጥቂት አሥርት ዓመታት የቤተ ክርስቲያኒቱ አማኞች ቁጥር ያሽቆለቆለው እንዲህ ባሉ ወራዳ ተግባራት፣ በእውነተኛይቱ ልጆቿ ላይ አጸያፊ ጥቃት ተፈጽሞና ተገፍተው ነው፤ ከመጠጥ፣ ከሲጋራ፣ ከመሸታ ቤት፣ ከዝሙት፣ ከሥጋ ሥራ ሳይለያዩና በክርስቶስ ሕይወት ሳይመላለሱ፣ ድንጋይ ጨብጦ፣ ቁጣ ለብሶ፣ በሥጋዊና በጥላቻ ልብ ታውሮ በወንድም ላይ እንዲህ ያለ አጸያፊ ተግባር መፈጸም “ኦርቶዶክሳዊነት” ሳይኾን አላዊነት፣ አረመኔአዊነት፣ ግብዛዊነት፣ ኢ ክርስቲያናዊነት ነው። ቤተ ክርስቲያን ነገም በዚህ ተግባሯ የምትቀጥል ከኾነ ከክርስቶስ ጋር ለአንድያው ትለያያለች። የንስሐ ደጇንም በራሷ ላይ ትዘጋለች፡፡

   በእስር ላሉ ለአርባ ምንጭ ወንድሞች፣ እጅግ ተደብድበው ሆስፒታል ለገቡት ወንድሞችና እህቶች የጌታ ጸጋ እንዲበዛላቸው እንማልዳለን፤ በመደብደባቸው፣ በመታሰራቸው፣ በመጠላታቸው፣ በመገፍተራቸው … አናዝንም፣ አንሰቀቅም፤ ዋጋቸው በሰማይ ታላቅ ነውና!!! ኦርቶዶክሳዊት ቤተ ክርስቲን ሆይ! በተሰሎንቄአዊ ልብ ክርስቶስንና ደቀ መዛሙርቱን፣ ወንጌሉንና ምስክርነቱን መግፋት ፈጽሞ አይረባሽም!!! መሲሑ ኢየሱስ ምሕረት ያደርግልሽ ዘንድ እንማልዳለን፤ መንፈስ ቅዱስም ልብሽን ያብራው፤ አሜን።