ይድረስ ለፓስተር ቸሬ!

 Please read in PDF

“ኢየሱስን መንፈስ ቅዱስ ብቻ እንጂ ሥጋና ደም አይገልጠውም!”

“ኦርቶዶክሶች ማርያም ካለቻቸው እንዴት ኢየሱስ የላቸውም ብለህ አሰብህ? … ።” (ከፓስተር ቸሬ ንግግር የተወሰደ)

ፓስተር ቸሬ፣ “ኤጳፍራ ቤተ ክርስቲያን” በሚባል ከወንጌላውያን አብያተ ክርስቲያናት በአንዱ፣ የሚያገለግል አገልጋይ ነው። አገልጋዩ በትዳር እንዲሁም ተያያዥ ጉዳዮችና በስህተት መምህራን ላይ በሚናገራቸው ንግግሮቹ በአብዛኛው ይታወቃል። እኔም በበኩሌ የተወሰኑ ትምህርቶቹን ለመከታተል ጥረት አድርጌ፣ በተወሰነ መንገድ ተጠቅሜበታለሁ። አገልጋዩ በትዳር ጉዳዮች ላይ ባለው ትምህርቱ ቢቀጥል፣ እጅግ ትርፋማ ይኾናል ብዬም ገምታለሁ። ከሰሞኑ ግን “ለኦርቶዶክሳውያን ወንጌል መሰበክ የለበትም፤ ያውቁታል” የሚል መልእክት ያለው ንግግር ማሰማቱን ሰምቼ ይህን ለመጻፍ ተገደድሁ።

ኢየሱስን ያወቅነው በማርያም አይደለም!

ጌታችን ኢየሱስ ክርስቶስ በግልጥ ቃል እንዲህ ይላል፦ “ከአብ በቀር ወልድን የሚያውቅ የለም፥ ከወልድም በቀር ወልድም ሊገለጥለት ከሚፈቅድ በቀር አብን የሚያውቅ የለም።” (ማቴ. 11፥27) ይህ ማለት፣ ስለ ጌታችን ኢየሱስ፣ ከአብ በቀር በሰማይም ኾነ በምድር ሊያውቅ የሚችል አንዳችም የሰማይም የምድርም አካል የለም፤ ማርያም ጭምር። ስለ አብም ቢኾን፣ “መቼም ቢሆን እግዚአብሔርን ያየው አንድ ስንኳ የለም፤ በአባቱ እቅፍ ያለ አንድ ልጁ እርሱ ተረከው።” (ዮሐ. 1፥18) ከተባለለት ከኢየሱስ በቀር ያወቀው፤ ሊያውቀውም የሚቻለው ሌላ ማንም የለም። ምክንያቱም፣ አብ የሚያውቀውን ኹሉ ወልድ ያውቃል፤ ወልድ የሚያውቀውንም ኹሉ አብ ያውቃል፤ እነርሱ በመለኮት፣ በፈቃድ፣ በዕውቀት፣ በዐሳብ አንድ ናቸውና (ዮሐ. 10፥30)።

ቅዱስ አብ፣ ስለ ኢየሱስ ካልገለጠለት በቀር፣ ኢየሱስን ማወቅ የሚቻለው ማንም የለም። አብ የገለጠለት ብቻ ኢየሱስን በትክክል ያውቀዋል። ቅዱስ ጴጥሮስ የኢየሱስን የእግዚአብሔር ልጅነት ሲመሰክር፣ ጌታችን ኢየሱስ እንዲህ አለ፣ “የዮና ልጅ ስምዖን ሆይ፥ በሰማያት ያለው አባቴ እንጂ ሥጋና ደም ይህን አልገለጠልህምና ብፁዕ ነህ።” (ማቴ. 16፥17)፤ አዎን፤ ኢየሱስን ማወቅ የሚቻለው አብ የገለጠለት ብቻ ነው፤ ወይም አብ በገዛ ፈቃዱ የመረጠው ብቻ ነው።

ኢየሱስ፤ አብን የሚያውቀውን ዕውቀት ላመኑት ኹሉ ይገልጣል፤ “ከአባቴ የሰማሁትን ሁሉ ለእናንተ አስታውቄአችኋለሁና።” (ዮሐ. 15፥15) እንዲል። እግዚአብሔርን ያወቅነው በእርሱ ዘንድ የነበረው አንድያ ልጁ መጥቶ፣ ስለ ነገረንና ስለ ተረከልን ነው። ያለ ኢየሱስ አብን አናውቀውም፤ ያለ አብም ወልድን ማወቅ የሚቻለው ማንም የለም። ሰዎች ያለ ኢየሱስ እግዚአብሔርን እናውቃለን ቢሉ፣ በፍጹም ሐሰተኞች ናቸው። እግዚአብሔር ራሱን የገለጠውና እንዲታወቅም የወደደው በልጁ በኩል ብቻ ነውና። መንፈስ ቅዱስ፣ ኢየሱስን ከሚያምኑት ጋር የሚሠራው ታላቁ ሥራ፣ አንድያ ልጅ ኢየሱስን ማስተማርና መግለጥ ነው፤ (ዮሐ. 14፥17፡ 26)፤ ኢየሱስ ወደ ሰማያት ካረገ በኋላ፣ ኢየሱስን የሚገልጠው መንፈስ ቅዱስ ብቻ ነው፤ ይህን ቦታ ማርያም ፈጽሞ ልትተካው አትችልም።

ስለ እግዚአብሔር ከኢየሱስ በቀር እውነተኛ አምላክነቱን የነገረን የለም፤ “በእርሱ የመለኮት ሙላት ሁሉ በሰውነት ተገልጦ ይኖራልና፤” (ቈላ. 2፥9) እንዲል፣ በሥጋ የተገለጠው አምላክ ወልደ አምላክ ወልድ፣ እርሱ የእግዚአብሔር ሙላት ነው። እግዚአብሔርንና ባሕርያቱን ያወቅነው፣ በፍጹሙና እንከን አልባ በኾነው መምህር በክርስቶስ ነው። አዎን፤ በሥጋ የተገለጠው ክርስቶስ፤ እግዚአብሔር ነው፤ ስለዚህም ከእርሱ በቀር በሙላት እግዚአብሔር ያወቀው የሚያውቀውም የለም። ስለ ክርስትናም ቢኾን መሲሑ መጥቶ፣ ባይነግረን ክርስትና የሚባል ሃይማኖት ባልኖረ ነበረ። አዎን፤ “ … የሚወደኝንም አባቴ ይወደዋል እኔም እወደዋለሁ ራሴንም እገልጥለታለሁ።” (ዮሐ. 14፥21) እንዲል፣ ኢየሱስን የሚነግረን ራሱ ኢየሱስና መንፈሱ ብቻ ናቸው።

ከዚህ የተነሣ የማርያም መኖር፣ የክርስቶስን መኖር አይተካም፤ እርስዋ ባልነበረችባቸው ወራት እርሱ ነበረ፤ እርሷንም በሞት አሳልፎ፣ ዛሬም በሕያውነት ያለው ክርስቶስ ኢየሱስ ብቻ ነው። ደግሞም እርሱ በር በኾነበት እርሷ ፈጽሞ ቁልፍ ልትኾን አትችልም፤ ይልቁን መጽሐፍ በግልጥ ቃል፣ “እነሆም፥ ከዘላለም እስከ ዘላለም ድረስ ሕያው ነኝ፥ የሞትና የሲኦልም መክፈቻ አለኝ።” (ራእ. 1፥18) ብሎ፣ የሕይወትና የሞት መክፈቻ ያለው እርሱ ብቻ መኾኑን መስክሮአል።

የኦርቶዶክሳውያን ማርያም!

ፓስተር ቸሬ እንደሚለው፣ የኢየሱስ እናት ማርያም ሳትኾን፣ ሌላዋ ማርያማ ናት በኦርቶዶክስ ቤት የምትመለከው። በግልጥ ስለ ማርያምና ስለ መስቀል እንዲህ ይባላል፤ “ለእሉ ክሌቱ ፍጡራን ስብሐተ ፈጣሪ ይደልዎሙ እስመ ተአረዩ በክብሮሙ።” ትርጉም፦ “ለነዚህ ለሁለቱ ፍጡራን ለማርያምና ለመስቀል የፈጣሪ ምስጋና[አምልኮ] ይገባቸዋል። በክብር ከፈጣሪ ጋር እኩል ሆነዋልና” [መስተብቍዕ ዘመስቀል]። ፓስተር ቸሬ፤ እንዲህ የምትመለከው ማርያም ወደ ተወዳጁ መሲሕ ታደርሳለች ብለህ ታምናለህን? ወይስ ይህች ማርያም ከመጽሐፍ ቅዱሷ ማርያም ጋር አንድ እንደ ኾነች ታስባለህን?

በቅርቡ የተመሠረተው ማኅበረ ቅዱሳን የተባለው ድርጅት፣ በሚጽፈው ጽሑፍ ኹሉ መደምደሚያ ላይ እንዲህ ይላል፦ “ወስብሐት ለእግዚአብሔር ወለወላዲቱ ድንግል ወለመስቀሉ ክቡር፤” ትርጉም፦ ለእግዚአብሔር፣ ለማርያምና ለመስቀል ምስጋና ይገባል” ማለት ነው። ፓስተር ቸሬ ይሰማሃል አይደል? እኮ ይህን ነው፤ ማርያም አላቸውና ኢየሱስ አለቻቸው የምትለው? ለመኾኑ በዚያ ቤት፣ ኢየሱስ በወርቀ ደሙ የመሠረተው አዲስ ኪዳን ተሽሮ፣ የማርያም “ኪዳነ ምሕረትነት” እንደሚሰበክ ታውቅ ይኾን?

አዎንታዊ ምልከታ!

በእርግጥ ቤቱ ሙሉውን ጨለማ ነው አንልም፤ በዚያ ጥቂት ብርሃን አለ ብለን ተስፋ እናደርጋለን፤ ያም ብርሃን በመንፈስ ቅዱስና በቃሉ ብርሃን አብዝቶ ቦግ ይልና ይበራ ዘንድ በጸሎት፣ በምልጃ፣ በቅዱስ ቃሉ ምስክርነት እንተጋለን። ነገር ግን በዚያ የቅዱስ ቃሉ ሥልጣን በምልአት አለ፤ የመጽሐፍ ቅዱሷ ማርያም በዚያ አለች፤ የኢየሱስ መካከለኝነት በድፍረት ይሰበካል፤ የተሸቀጠው ወንጌል አይሰበክም፤ የፍጡራን መካከለኝነት(የማርያም፣ የአርሴማ፣ የተክለ ሃይማኖት፣ የጊዮርጊስ …) አልገነነም፤ አይሰበክም ብለን ግን የፈጠጠውን እውነት አንክድም። በዚያ በትክክል ቅዱሱ ወንጌል ተገፍቶአልና!

ማጠቃለያ!

ፓስተር ቸሬ ሆይ፤ ይህን ንግግር በዚያም መንደር ተቀባይነትን ለማግኘት ተናግረኸው ከኾነ እጅግ ያሳዝናል፤ ነገር ግን በተላላነትና ባለመጠንቀቅ ከኾነ ግን ታስተካክላለህ ብለን ተስፋ እናደርጋለን። በዚያ ያለችው ማርያም፤ የማትመለክ እንዳይመስልህ፤ እኩል ከፈጣሪ ጋር በስብሐተ ነግህና በኪዳኑ፤ በሰዓታትና በማኅሌቱ እንክት አድርጋ ትመለካለች፤ ትወደሳለች፤ ከፈጣሪ ጋር አምለኮ ትጋራለች። ይህ ቤተ ክርስቲያኒቱን ያከሰረ የጨለማ መንገድ ነው። ነገር ግን ለመሲሑ እንዲህ ተብሎለታል፤ “መጽሐፉን ትወስድ ዘንድ ማኅተሞቹንም ትፈታ ዘንድ ይገባሃል፥ ታርደሃልና፥ በደምህም ለእግዚአብሔር ከነገድ ሁሉ ከቋንቋም ሁሉ ከወገንም ሁሉ ከሕዝብም ሁሉ ሰዎችን ዋጅተህ ለአምላካችን መንግሥትና ካህናት ይሆኑ ዘንድ አደረግሃቸው፥ በምድርም ላይ ይነግሣሉ እያሉ አዲስን ቅኔ ይዘምራሉ።” (ራእ. 5፥9-10)። አሜን፤ ብቸኛው በራችንና የሕይወትን ቁልፍና መክፈቻ የያዝኸው አዳኛችን ኢየሱስ ሆይ፤ ብቻህን እናመልክሃለን፤ እንገዛልሃለን፤ አሜን።