Namni nama malee Hafuraa miti! (kutaa 1ffaa)

Please read in PDF

Seensa

    Jaarraawwan dheeraa duraan eegalee “Namni eenyu ykn maali?” gaaffii jedhuuf; deebiwwan adda addaa fi walfaallesan kennamaa turaniiru. Deebiwwan tokko tokkoo nama gara hooritti kan gad buusan yoo ta’an, tokko tokko immoo nama gara faallaa eenyummaa isaatti kan geesanii dha.[1]

   Hiika eenyummaa namaa ilaalchisee irra caalaan foon isaa wajjiin walqabsiisani hiika itti kennuun; namni jiruu fi jireenya biyya lafaa kanaa alatti akka hinqabane yoo ibsan; isaan kaan immoo Waqayyoo wajjiin walitti hidhuun waggootan kan dhuma hinqabnee fi jiraataa bara baraa godhuun kaa’u. Haata’uti Waa’e uumama namaa kan dubbachuu danda’u kan isa uume ykn argamsisee qofa dha.

   Ka’umsa uumamaa ykn ummamummaa namaa sirrittii beekuu dhabuun gara Waaqayyoo dhugaatti fuula keenya akka gara hingalchinee nu taasisuu danda’a.  kanaaf eenyummaa ofii akka Waaqayyoon nuun jedhu qofatti beekuun karaa hubbannaa fi bayyee gaariis dha. Barsisootni Sochii Amantii (Faith Movement) garuu eenyummaa namaa hafuura qofa akka ta’e barsisuun Waaqummaas akka qabaachuu danda’u ni ibsu; garuu kun akka hintaane Macaafa(kitaaba) Qulqulluu madda godhachuun baruumsichi kan sagalee Waaqayyoo akka hin taane ni saaxilla.

Namni eenyu?

    Kitaabnni Qulqulluu waa’ee enyummaa namaa ykn maalummaa namaa gabaabse garuu ifatti kaa’a. Kitaabni Qulqulluu waa’ee namaa kan ibsu;

1.     Uumaan uumama irraa adda ta’u;

2.    Namni Kan uumame ta’u;

3.    Kan uumes Waaqayyoo ta’u;

4.    Namni uumama keessaa tokkoo ta’u;

5.    Namni yeroo uumamuu wantoota lama ykn sadii kan of keessa qabu ta’u fi dhugaalee biroos kan ibsu ta’u isaati.

“Kana booddee Waaqayyo, kottaa! Akka bifa keenyaatti, akka fakkaattii keenyaattis nama ni umnaa! ... Egaa Waaqayyo akka bifa isaatti nama uume, akka bifa Waaqayyootti isa uume; dhiiraa fi dubartii isaan uume;”  (Uma. 1:26-28)

   Waaqayyoon bantiiwwan waaqaa fi biyya lafaa kana hunda uume kan xumure guyyaa jaha keessatti qofa akka ta’e; Seerri Umamaa boqqonaan tokko fi lama ifatti ni kaa’a. namnis uumama kanneen keessaa isa tokko dha malee; innis uuma ykn Waaqayyoodhaan haala addaatiin haalli qixxee ittiin ta’u ykn ol guddatee ta’u ittiin malu tokkolee hinjiru.

    Barsisootni Sochii amantii(Faith Movement)[2] Kitaabni Qulqulluu “namni fooni(biyyoo lafaa) fi lubbuu ykn hafuura qaba” baruumsa jedhuu gonkumaa hinfudhatan. Faallaa kanaatinis; “namni haafura, lubbuu ni qaba, foon keessatti jiraata.”[3] Jechuun barsiisan. Baruumsa kanaanis maalummaa biyyoo lafaa uumama namaa; guutumaan guututti waakachuun, walitti dhufeenyi fooni fi lubbuu ykn hafuuraa kan hinjirree ta’u ifatti ni lallaban.

  Duuba baruumsa kanaa ykn dhuma irratti bu’a maal buusuuf baruumsicha kana barsisan? jennee sirritti yoo qoranneen alatti; baruumsichi faallaa jecha Qulqulluu Waaqayyoon ta’u isaa sirritti hinhubbannu. Kaayyoon baruumsa Sochi amantaa(faith movement) guddaan “namni Waaqayyoo akka ta’e” namaan wal barsisuu dha.” Kana garuu ifatti hinjedhan. Hanga danda’ametti namni isaan hordofuu hundinuu ijaa fi onnee isaa sakaale duuba isaanitti hanga hiriirutti baruumsicha walxaxuudhaan beekaman.

   Namni yomiyyuu taanan nama malee foon qofa ykn hafuura qofaa miti. Namni waan nama isa jechisiisu fooni fi lubbuu ykn hafuura of keessaa qaba. Uumamni isaatiis bifaafi fakkaatti Waaqayootiin kan Uumamee dha. Bifaati fakkaatiin Waaqayyoo maali? Namootni wangeela soorumma(Prosperity Gospel) barsiisan “namni hafuura dha” jechuuf maal hirkatan laata? Kutaa itti aanutti biyya alaa fi biyya keenya keessaa namootni baruumsa wangeela soorummaa kana hordofan eenyu fa’a akka ta’aniifi baruumsi isaanis faallaa Wangeela dhugaa akka ta’e; kitaaba qulqulluu bu’ureefachuun ni ilaala. Waaqayyoon Hafuura Qulqulluu baruumsa sobaa irraa sammuu fi onnee keenya yaa nuuf eeguu. ameen.

Itti fuufa …

---

   [1] Deebiwaan kennaman keessaa Chaarlis Daarwin sayiinsii jijjirama suuta suutaa(Evolution) jedhamuun, namni ykn uumamnii akka waliigalaatti yeroo murtaa’a keessatti kan argame miti . waggoota miliyoonan lakkawaawamu keessatti suutaan adeemsa keessatti kan argame dha. Karaa birootiin uumamni guyyoota jaha hincaalle keessatti guutumatti ni argama jedhee hinfudhatu. 

   [2] Moggaafama maqaa kana kan argatan; baruumsa barsiisan irraa kan ka’eeni. “Waaqayyoon amane sagalee baase dubbateen waan hunda raawatee kanaaf namni kamiyyuu yoo amanee waan amanee sana dubbatee waan hunda raawachuus argachuus danda’a” sababa jedhaniif moggaafama kana kan argatan yoo ta’u; Soorummaa irratti xiyyeefannaa guddaa kennan waan ta’eef; “barsiisota Wangeela Sorummaa”; sagalee irrattiis bayyee hirkatuu waan ta’eef “Barsisoota amantaa sagalee” jedhamaniis waamamuu. Moggaafama kana haala kamiin akka isaanitti moggaafamee fi hundeen baruumsa isaani maal akka ta’e Humna Waaqayyootiin fulduratti tartibaan kan waliin ilaalu ta’a.

   [3] Baruumsa kana barsisootni Sossoochii Amantaa(Faith Movement) hundi qube takka keessaa osoo hindagatin barsiisu. Keessattu abbaa barumsichaa ken jedhamaa beekamuu Keenet Hegeen namni jedhamu baruumsicha; “Man is a Spirit who possesses a soul and lives in a body.” (Hagin,Kenneth E.; “Man on Three Dimension” Vol. 1 of the spirit, soul and body series 18^th printing; Tulsa; Kenneth Hagin Ministries; 1994 pp.8) jedhee ibsuu isaatiin beekama.